05 октября 2011 г.
Пĕрле савăнтăмăр
Москакасси ял тăрăхĕнче хисеплĕ ватăсене чысласси ырă йăлара. Кăçал та Ватă çынсен кунне чаплăн паллă турăмăр. Сентябрĕн 30-мĕшĕнче Москакассинчи вăтам шкулта асатте-асаннесем йышлă пухăнчĕç. Малтан вĕсем шкул музейĕпе паллашрĕç. Кунти ĕçсем пурин кăмăлне те кайрĕç. Унта хăйсен сăн ÿкерчĕкĕсене курсан ватăсем питех те савăнчĕç.
Актовăй залра вĕсене малтанах Москакасси ял тăрăхĕн пуçлăхĕ А. Матросов ăшшăн саламласа канлĕ ватлăх та вăрăм кун-çул сунчĕ. Район администрацийĕн пуçлăхĕ ячĕпе В. Лаврентьев сăмах каланине те уява пынисем кăмăллă итлерĕç. Москакасси шкулĕн ертÿçи И. Иванов, пенсионерсен совечĕн ертÿçи В. Беспалова сумлă ватăсене чунтан саламларĕç. Уявра юбилярсем нумай пулнăран тĕл пулу каçĕ вĕсене чысланипе иртсе пычĕ. Малтанах 95 çула çывхаракан Н.С. Беловăна саламласа парне парса чыс турăмăр. Хăйне те сăмах патăмăр. Неонила Степановна çак вăхăтра мĕн кăна курман, мĕн кăна чăтса ирттермен пулĕ; Çакăн пек хисеплĕ юбилярсем залра чылай пулчĕç. Кашнинпех ăшă калаçу ирттертĕмĕр. Вĕсем пирĕн ыйтусем çине хаваспах хуравларĕç.
Пухăннисене саламласа Москакасси шкулĕнче вĕренекен Д. Макарова илемлĕ юрăсем шăрантарчĕ. Ташă ушкăнĕ ташăсемпе савăнтарчĕ. «Шуçăм» юрăпа ташă ушкăнĕн хĕрĕсем илемлĕ чăваш юррисемпе уява хăт кĕртрĕç.
Концерт вĕçленнĕ хыççăн пурне те столовăйне йыхравларăмăр, тутлă апат-çимĕçпе сăйларăмăр. Кунта та илемлĕ юрă-кĕвĕ пирĕнтен уйрăлмарĕ.
Уява хаваслă ирттерме пулăшнăшăн Москакасси ял тăрăхĕн пуçлăхне А. Матросова, «Заря» ООО директорне И. Терентьевăна, О. Шураев предпринимателе, Москакасси вăтам шкул директорне И. Иванова тав тăватпăр.
Г. Голубева,
Москакасси ял тăрăхĕнчи хĕрарăмсен канашĕн ертÿçи.