05 октября 2011 г.
«Профессие ăнсăртран суйламан»
Мария Порфирьевна Огадярова Юнкăри вăтам шкулта пуçламăш классене вĕрентет. Вĕрентÿ ĕçĕнче вăл 22 çул ĕнтĕ. Шкул вĕренсе пĕтернĕ хыççăн çак профессие вăл ăнсăртран суйламаннине пĕлтерет: ачасене юратнă, урăх ĕçре хăйне курман та, ăна хăйне те шкулта лайăх учительсем вĕрентнĕ.
Канашри педагогика училищинче, Чăваш патшалăх педагогика институтĕнче илнĕ пĕлÿпе никĕсленсе Мария Порфирьевна вăхăт ыйтакан çĕнĕлĕхсене те ĕçре пĕлсе усă курать. Ăсталăх шайне ÿстерессипе те тимлет – хальхи вăхăтра вăл 1 категориллĕ учитель. Ачасемпе ăшшăн калаçса уроксене лăпкă ирттернипе пĕрлех вăл вĕренекенсенчен çирĕп ыйтать.
Ачасемпе тĕрлĕ енлĕн ĕçлени хăйĕн «çимĕçне» нумай кĕттермест: юлашки виçĕ çула илес пулсан акă унăн вĕренекенĕсен 60 процентне яхăн «4» тата «5» паллăсемпе ĕлкĕрсе пырать. «Русский медвежонок», «Кенгуру», «Инфознайка» Пĕтĕм Раççей конкурсĕсене хутшăнса ачасем сертификатсем кăна мар, дипломсем те çĕнсе илнĕ. Раççейри çамрăксен математика чемпионатне хутшăннă Надежда Егоровăн кăтартăвĕ районта чи лайăххи пулнă. Республика шайĕнчи «Навстречу к звездам» ÿкерчĕксен конкурсĕн икĕ дипломĕ Юнкă шкулнех «килчĕç»: Мария Порфирьевнăн вĕренекенĕсем çĕнсе илнĕ вĕсене. Çитĕнÿсем татах та нумай.
Кăçал Мария Порфирьевна 1-мĕш класпа ĕçлеме пуçларĕ. Апла пулсан – çĕнĕ стандартпа. Анлă тавра курăмлă, хастар вĕрентекен уроксем ирттернипе пĕрлех класс тулашĕнчи ĕçе те хаваспах пурнăçлать. 2008 çулта район администрацийĕн пуçлăхĕн грантне çĕнсе илнĕ педагог ачасем ăс-тăна та, ытти енсене та аталантарса ÿсчĕр тесе тăрăшать.
И. Киршева,
Юнкăри вăтам шкулти аслă вожатăй.