05 октября 2011 г.
Халăха кирлĕ ыйтусене сÿтсе явнă
Çак кунсенче район администрацийĕн пуçлăхĕ Ю.А. Иванов Чăваш Республикин Министрсен Кабинечĕн Председателĕпе О.В. Макаровпа тĕл пулнă. Ĕçлĕ тĕл пулура 2012–2014 çулсенчи республикăри адреслă инвестици программине Муркаш районĕнчи хăш-пĕр объектсене кĕртсе хăварассине сÿтсе явнă.
Чи малтанах тĕл пулура Муркашри районти Культура çуртне реконструкцилес ыйтăва пухса тухнă. Асăннă объектпа проектпа смета документацине хатĕрлесе ăна патшалăх экспертизи витĕр тухма тăратнă.
Мăн Сĕнтĕрте вара культурăпа кану центрĕ çумне хушма çурт (пристрой) тăвас ыйту кун йĕркинчен тухмасть. Çакă кунти Культура çурчĕ Шупашкарти Свято-Троицки арçынсен мăнастирĕпе пĕр çуртра вырнаçнипе çыхăннă. 200 вырăнлă Культура çуртĕнче массăллă мероприятисем иртеççĕ. Çакă мăнастирте служба ирттерме меллех мар. Мăн Сĕнтĕрти культурăпа кану центрĕ (унта кружоксем ирттермелли 3 пÿлĕм, библиотека пур, анчах куракансем валли зал та, сцена та çук) çумне куракансем валли сценăллă зал туса лартни çак ыйтăва татса пама пулăшĕччĕ. Çапла вара Культура çурчĕн пÿлĕмне Шупашкар – Чăваш епархине тавăрса пама та май пулать.
Районта çулсеренех ачасен йышĕ ÿсме пуçларĕ. Çакă ача сачĕсем тăвас ыйтăва кăларса тăратать. Районта хальхи вăхăтра Муркашра 200 вырăнлăх çĕнĕ ача сачĕ тата Мăн Сĕнтĕрти ача сачĕ çумне тата 80 вырăнлăх хушма çурт туса лартассипе проектпа смета документацине хатĕрлес ыйтупа ĕçлеççĕ.
Районти тĕп больницăн поликлиникине тăвас ыйту та вырăнтан тапраннă. Сменăра 500 çынна йышăнмалли пулас поликлиникăн проекчĕ экспертиза витĕр тухнă ĕнтĕ.
Юнкăри пĕтĕмĕшле пĕлÿ паракан шкул çумне спорт залне тăвасси – пурнăç кăларса тăратнă ыйту. Шкулта 171 ача вĕренет. Вырăнти çамрăксем те спортпа туслă. Шкул çумне тумалли спорт залĕн проекчĕ патшалăх экспертизи витĕр тухнă.
Çак объектсене 2012–2014 çулсенчи республикăри адреслă инвестици программине кĕртни вĕсене пурнăçлассине хăвăртлатма май парать. Тĕл пулура çавăн пекех ялсем хушшинче çул тăвас, çÿп-çап тăкмалли полигона тăвассипе çыхăннă хăш-пĕр ыйтусене те сÿтсе явнă.
Л. ПАВЛОВА.