01 октября 2011 г.
«Ачасене вĕсене юратакан çынсем кĕтсе илччĕр»
Ытлари кун, сентябрĕн 27-мĕшĕнче, районти шкулчченхи вĕрентÿ учрежденийĕсенче ĕçлекенсем хăйсен уявне паллă турĕç. «Çĕр çинчи чи романтикăллă профессине суйласа илнисем» – кашни ир ачасене ăшă кулăпа кĕтсе илекенскерсем – чăнах та, вĕсене юристсем те ăмсанма пултарнине кăтартса пачĕç.
Ача садĕнче ĕçлес тесен çирĕп кăмăллă пулмалла. Çакна район администрацийĕн пуçлăхĕ Ю.А. Иванов та палăртрĕ: «Кашнине ăнланмалла, çав вăхăтрах шăпăрлансен ушкăнне йĕркелесе тăмалла». Хăйсен ĕçне çапла йĕркелеме пултарнисене шăпах район администрацийĕн Хисеп грамотипе чысларĕ Юрий Александрович. Район администрацийĕн вĕрентÿ, çамрăксен политики тата физкультурăпа спорт пайĕн грамотисене тивĕçнисем те сахаллăн пулмарĕç.
Пĕчĕк çынран çын тăвас мисси – йывăррисенчен тата яваплисенчен пĕри. «Анчах та чи пĕлтерĕшли – ачасене ирсерен вĕсене юратакан çынсем кĕтсе илччĕр. Çак юрату вара вĕсем патне каялла ытлашшипех таврăнтăр», – ача сачĕсенче вăй хуракансене саламланипе пĕрлех çапла сăмах та пулчĕ район администрацийĕн вĕрентÿ пайĕн пуçлăхĕн З.Ю. Дипломатовăн.
Ĕçе творчествăлла пурнăçлани воспитательсене кулленхи ĕçре кăна мар, тĕрлĕ шайри конкурссене хутшăнма та пулăшать. Акă «Солнышко» ача сачĕ Чăваш Республкин Президенчĕн 200 пин тенкĕлĕх грантне çĕнсе илнĕ. Республикăри «Ача сачĕсем – ачасене» конкурсра «Путене» ача сачĕ çĕнтерме пултарнă. Мăн Сĕнтĕрти «Мечта» ача сачĕ вара территорие тирпей-илемпе хăт кĕртессинче республикăра виççĕмĕш вырăн йышăннă. Йÿçкассинчи «Василека» та кăçал республикипех пĕлчĕç. Унти пластик савăтсенчен туса хатĕрленĕ илем тĕнчи кашнинех тыткăна илчĕ.
Чăваш Республикин Президенчĕн 20 пин тенкĕлĕх грантне çĕнсе илнĕ республикăри пултаруллă ĕçченсен йышне Отарккăри «Малыш» ача садĕнче вăй хуракан В.В. Гусева логопед учитель кĕме пултарнă. Çакна çирĕплетекен свидетельствăна Валентина Валерьяновна уявра район администрацийĕн пуçлăхĕнчен илчĕ.
Уява воспитательсем КВН вăййипе тăсрĕç: Муркашри «Солнышко», «Путене», Москакассинчи «Колокольчикпа» Отарккăри «Малыш» ĕçтешĕсене хавас кăмăл та парнелерĕç, çав вăхăтрах «ФГТ» темине те манмарĕç.
Кăçалтанпа пур ача сачĕ те федераллă патшалăх требованийĕсене пăхăнса ĕçлеме пуçларĕ. Апла çĕнĕ программăна пурнăçа кĕртессипе нумай тăрăшмалла, çĕнĕ проектсем вăя кĕртмелле. Воспитательсем вăйăра вĕсене çак çĕнĕлĕх пĕртте хăратманнине пĕлтерчĕç. Пурнăçра та ăна çăмăллăнах çĕнтерме вĕсен вăй-халĕ ан иксĕлтĕр.
Н. Николаева.
Сăн ÿкерчĕксенче: район администрацийĕн Хисеп грамотине тивĕçнĕ «Березка» ача садĕнче ĕçлекен Маргарита Александровна Иванова ĕçтешĕпе Галина Федоровна Юнусовăпа; «Путене» ача садĕнчи хореографи занятийĕсене ертсе пыракан Ольга Вячеславовна Григорьевăн ĕçне пысăк хак пачĕç.
Автор сăн ÿкерчĕкĕсем.