28 сентября 2011 г.
Ыйтăвĕсем пурте пĕлтерĕшлисем
Сентябрĕн 23-мĕшĕнче ял тăрăхĕсен пуçлăхĕсем хăйсен черетлĕ канашлăвне пухăнчĕç. Малтанах вара вĕсем ветерансен районти канашĕн, старейшинăсен район администрацийĕн пуçлăхĕ çумĕнчи канашĕн тата «Раççей пенсионерсен союзĕ» чикĕллĕ яваплăхлă обществăн районти организацийĕн анлă ларăвĕн, кайран вара правăна пăснине асăрхаттаракан профилактика комиссийĕпе район администрацийĕн пуçлăхĕ çумĕнчи право йĕркелĕхне тивĕçтерессин комиссийĕн пĕрлехи ларăвĕн ĕçне хутшăнчĕç.
Район администрацийĕн пуçлăхĕ Ю.А. Иванов районти паянхи лару-тăрăва хак панă май çавна палăртрĕ. Ял хуçалăхĕнче йывăрлăхсем пур-ха. Хăш-пĕр хуçалăхсенче вырма ĕçĕсем те вĕçленеймен. Çумăрлă çанталăка пула çĕр улми пухса кĕртесси те уксахлать. Выльăх апатне вара кăçал ытлă-çитлĕ янтăласа хăварнă. Выльăхсене лайăх хĕл каçарса вĕсенчен продукци нумайрах илме пур майсем те çителĕклĕ. Вĕсене витесенче тытса усрама пуçăнма та вăхăт ĕнтĕ.
Промышленность продукцине туса кăларассинче, ытти енĕпе лайăх енсем çук мар. Çуртсене хутса ăшăтмалли тапхăр пуçăниччен шутлă кунсем юлаççĕ.
Октябрĕн 1-мĕшĕнче Ватă çынсен кунне паллă тăватпăр. Çавна май ветерансен районти канашĕн председателĕ М.В. Виноградова ăна хатĕрленсе ирттерессин ыйтăвĕсене хускатрĕ.
Шел пулин те районта правăна тивĕçтересси кирлĕ шайра теме çук. Икĕ уйăх каялла Ярапайкасси ял тăрăхне кĕрекен Сыпайкассинче çĕрле вырăнти тата Шупашкартан килнĕ яшсем хушшинче пулса иртнĕ массăллă тÿпелешÿ те çавăн пирки калать. Унта çул çитмен çамрăксем пулни те паллă. Районти шалти ĕç-сен пайĕн пуçлăхĕ Е.И. Плечов пĕлтернĕ тăрăх ку йĕркесĕрлĕх пирки уголовлă ĕçсем пуçарма тивнĕ. Вăл культура учрежденийĕсен ĕç режимне кирлĕ пек йĕркелеме, талăкĕпех ĕçлекен апатлану предприятийĕсенче çĕрле эрех сутассине чарма сĕнчĕ. Халăх дружинисен, ашшĕ-амăшĕсен патрулĕн ĕçĕсене йĕркелени те ку тĕлĕшпе пысăк тĕкĕ.
Право йĕркелĕхне тивĕçтерессипе профилактика ĕçне йĕркеленĕ. Районти шалти ĕçсен пайĕн сотрудникĕсем кану кунĕсенче çĕрлехи вăхăтра культура учрежденийĕсем тăрăх рейдсене тухаççĕ. Çапах та тивĕçлĕ йĕрке тăвас тесен пурин те пĕрле çыхăнса ĕçлесе пыни кирлĕ.
Ял тăрăхĕсен пуçлăхĕсенчен чылайăшĕ полицин участоксенчи уполномоченнăйĕсен ĕçĕпе кăмăлсăр. Вĕсем çирĕплетсе панă участоксенче вăхăтран вăхăта кăна пулкалаççĕ. Ку вара вăл 16 ял тăрăхĕ валли участковăйсен 10 пунктне кăна хăварнипе те çыхăннă. Евгений Иванович участковăйсене уйрăм кабинетсемпе, хальхи техника хатĕрĕсемпе тивĕçтерни пысăк пĕлте-рĕшлĕ пулнине палăртрĕ.
Ку тĕлĕшпе район администрацийĕн пуçлăхĕн Ю.А. Ивановăн сĕнĕвĕсемпе килĕшмесĕр тăма май çук. Вăл хăйĕн сăмахĕнче çавна палăртрĕ. Ял тăрăхĕсенче эрнесерен ирттерекен канашлусене участковăйсене чĕнессине практикăлас пулать. Участковăйсен пункчĕсене пур çĕрте те йĕркене кĕртсе çитермелле. Участковăйăн ĕç графикĕ, унпа çыхăнмалли телефон номерĕ курăнмалли вырăнта çакăнса тăччăр. Культура учрежденийĕсен хăйсен ĕç планĕсене участковăйсемпе килĕшсе йĕркелемелле. Культура учрежденийĕсене çĕрле мĕн вăхăтчен ĕçлеттерессине вырăнсенче хăйсен конкретлă татса памалла. Талăкĕпех ĕçлекен обществăлла апатлану предприятийĕсем тĕлĕшпе те çавнах каламалла. Ирĕклĕ халăх дружинисен, ашшĕ-амăшĕсен патрулĕсен ĕçĕ-хĕлĕ хальлĕхе курăнсах каймасть. Çул çитмен ачасем çĕрле клубсем тăрăх сулланса çÿрени йĕркеллĕ пулăм мар. Культура учрежденийĕсем хăйсен ĕçне ячĕшĕн мар, тĕллевлĕ туса пыни кирлĕ. Çĕрлехи вăхăтра учреждени таврашĕнче çутă çутассине йĕркелемелле, видеонаблюдени, хăрушлăх çыхăнăвĕн кнопкисем те пулмалла.
Район администрацийĕн пуçлăхĕн çумĕ, йĕркелÿпе кадрсен, право енĕпе тивĕçтерессин тата вырăнти самоуправлени органĕсемпе ĕçлекен пайĕн пуçлăхĕ Л.Ю. Тарасова РФ Федераллă Пухăвĕн Патшалăх Думин депутачĕсен тата ЧР Патшалăх Канашĕн депутачĕсен суйлавĕсене йĕркеллĕ ирттерессин ыйтăвĕсене хускатрĕ.
Правăна пăснине асăрхаттаракан профилактика комиссийĕпе район администрацийĕн пуçлăхĕ çумĕнчи право йĕркелĕхне тивĕçтерессин комиссийĕн пĕрлехи ларăвне хутшăнакансем ял тăрăхĕсен территорийĕсенче профилактика кунĕсене ирттерни пĕлтерĕшлĕ пулнине палăртрĕç, малашне те кĕçнерни кунсенче ял тăрăхĕсене тухса кун пек мероприятие йĕркелеме йышăнчĕç.
Ял тăрăхĕсен пуçлăхĕсен канашлăвĕ савăнăçлă лару-тăруран пуçланчĕ. Район администрацийĕн пуçлăхĕ Ю.А. Иванов 7 çамрăк çемьене пурăнмалли çурт-йĕр туянма е харпăр хăйĕн уйрăм çуртне тума социаллă тÿлев илме май паракан свидетельствăсем пачĕ, ĕçре тăрăшуллисене, малашлăхшăн тăрăшакансене патшалăх енчен пулăшу яланах пулассине палăртрĕ.
Район администрацийĕн пуçлăхĕн пĕрремĕш çумĕ В.А. Калинин Федераллă саккунпа килĕшÿллĕн çĕр участокĕпе яланлăх усă курассин правине ăна арендăна илессин е сутăн илессин правипе улăштарассин ыйтăвне уçăмлатса пачĕ.
«Ачаллă çемьесене патшалăх енчен пулăшу памалли хушма мерăсем çинчен» Федераллă саккуна пурнăçа кĕртес тĕлĕшпе вырăнти самоуправлени органĕсемпе çыхăнса ĕçлесе пынин пĕлтерĕшĕ пысăк. РФ Пенси фончĕн районти управленийĕн пуçлăхĕ Е.М. Александрова палăртнă тăрăх ача амăшĕн капиталĕпе усă курас ĕçсем 2009 çултанпах анлă сарăлнă. Елена Михайловна граждансем валли документсем хатĕрленĕ чухне ял тăрăхĕсен пуçлăхĕсен тимлĕрех те ответлăрах пулмаллине палăртрĕ.
Нумай ачаллă çемьесене çĕр участокĕ тÿлевсĕр уйăрса парас ыйтупа район администрацийĕн пуçлăхĕн çумĕ В.Г. Никитин тухса калаçрĕ. «Чăваш Республикин «Чăваш Республикинче нумай ачаллă çемьесене çĕр лаптăкĕсем уйăрса парассин çинчен» Саккунне улшăнусем кĕртесси çинчен» Саккун йышăннă. Унпа килĕшÿллĕн муниципаллă районсен тата ял тăрăхĕсен муниципалитет харпăрлăхĕнче шутланакан çĕрсенчен нумай ачаллă çемьесене харпăрлăха тÿлевсĕр уйăрса паракан çĕр лаптăкĕсен чи пысăк виçисене çакăн пек палăртаççĕ: харпăр хăйĕн çуртне лартма – 0,15 гектар, дача тума – 0,15 гектар, хушма хуçалăх йĕркелеме – 1,0 гектар. Унччен вара ку лаптăксене 0,12 гектар, 0,10 гектар, 0,20 гектар палăртнă пулнă.
Çавăн пекех Владимир Германович çĕнĕ полигона йăла каяшĕсене турттарассипе ял çыннисемпе килĕшÿсем тăвасси пирки чарăнса тăчĕ. Çакă вăл тавралăх тирпей-илемĕшĕн кашнин ответлăхне ÿстерме тивĕç.
Канашлу итогĕсене пĕтĕмлетнĕ май район администрацийĕн пуçлăхĕ Ю.А. Иванов сÿтсе явнă кашни ыйтăвах пĕлтерĕшлĕ пулнине, вĕсене пурнăçлассипе ответлăха туймаллине палăртрĕ.
В. ШАПОШНИКОВ.