28 сентября 2011 г.
Кросра – ачасем те, ветерансем те
Иртнĕ вырсарни кун Муркашри стадиона çын чылай пухăнчĕ. Олимп чемпионкин Валентина Егоровăн парнисене çĕнсе илессишĕн ирттернĕ ăмăрту шкул ачисене старта йыхравларĕ. Унпа пĕрлех иртнĕ «Наци кросĕ – 2011» чупăва ача садне çÿрекенсенчен пуçласа тивĕçлĕ канăва тухнисем таранах хутшăнчĕç.
Кăçал Муркашсем «Наци кросне» кĕртнĕ çĕнĕлĕх хăйне тÿрре кăларчĕ: стадионта ăмăрту пуçланиччен чылай малтан ача-пăчан хаваслă кулли илтĕнчĕ, выляса чупни курăнчĕ. Ăмăртăвăн ятарлă футболкисене тăхăнсан вĕсем те «спортсменсем» пулнине пĕлтерчĕç. Пĕчĕккисем ăмăртнине вара куракансем ытти стартсенчен ытларах кĕтрĕç. Шăпăрлансене стадионта çул кăтартса пыма тĕнче класлă спорт маçтăрне Нина Охотниковăна шанчĕç. 250 метрлă дистанцие ачасем çăмăллăнах парăнтарчĕç.
Милена Иванова («Солнышко» ача сачĕ), Катя Смирнова («Колокольчик») тата Ирина Смирнова («Путене») – çак хастар хĕр ачасем çĕнтерÿçĕсен картлашки çине хăпарма тивĕçрĕç. Арçын ачасенчен Богдан Яриков (Кашмаш), Никита Волков тата Павел Макаров (иккĕшĕ те Муркашран) мала тухрĕç.
Пĕчĕккисем хыççăн шкулта вĕренекенсем тĕрлĕ ÿсĕмсенче ăмăртрĕç. Ăмăртăва хутшăнма Етĕрне районĕнчен те, Туçи Çармăс районĕнчен те килсе çитнĕччĕ.
1999 çулта çуралнисен тата кĕçĕнреххисен ÿсĕмĕнче шăпах Туçи Çармăс районĕнчи Дмитрий Макаровпа Муркашри вăтам шкулта вĕренекен Екатерина Мясникова пĕрремĕш вырăна тухрĕç.
1997–1998 çулсенче çуралнисен чупăвĕнче те хăнасем палăрчĕç. Çĕнтерÿçĕ ятне кÿршĕ республикăри Кирилл Поствайкин тата Шетмĕпуçĕнчи тĕп шкулта вĕренекен Павел Никоноров, Атапайри тĕп шкулта вĕренекен Татьяна Блиновăпа Ярапайкассинчи вăтам шкулти Диана Чернова тивĕçрĕç.
1995–1996 çулсенче çуралнисен чупăвĕнчи çĕнтерÿçĕсем Йÿçкассинчи вăтам шкулти Петр Семеновпа Ярапайкассинчи вăтам шкулти Светлана Соколова пулчĕç.
Ăмăртура ертÿçĕсемпе вĕсен çумĕсем те хăйсене тĕрĕслерĕç. Район администрацийĕн пуçлăхĕпе Ю.А. Ивановпа пĕрле Чăваш Республикин Патшалăх Канашĕн председателĕн çумĕ В.П. Мидуков та Муркаш стадионĕнчи дистанцие парăнтарчĕ.
Ăмăртăва килсе çитнĕ тĕнче рекордсменки Вера Соколова вара Нина Охотниковăпа пĕрле старта ĕç коллективĕсен представителĕсемпе тухрĕç. Ку чупусенче Никита Николаевпа Дина Замятина («Моргаушская» чăх-чĕп фабрики» акционерсен уçă пĕрлешĕвĕн командинчен) иккĕшĕ те мала тухса хăйсен командине кубокпа тивĕçтерме пултарчĕç. Хыççăнхи вырăнсенче – Шалти ĕçсен министерствин Муркаш тăрăхĕнчи уйрăмĕпе «Свобода» хуçалăхăн команди.
Çакăн пек сумлă ăмăрту, паллах, ветерансемсĕр пулма та пултараймасть. Тивĕçлĕ канăва тухнисем те маттур: Вениамин Васильевич Федоровпа Тамара Зиновьевна Александрова мала тухса çакна çирĕплетрĕç кăна.
Сывă пурнăç йĕркине тытса пыма çакăн пек массăллă стартсем те хистеççĕ, тĕслĕх кăтартаççĕ. «Хальхи вăхăтра обществăра спортпа туслă, сывă пурнăç йĕркине тытса пыракансем кирлĕ. Вĕсене ытларах хаклаççĕ, вĕсем ăнăçлăрах, пурнăçра та тĕрĕс çул тупаççĕ». Çак шухăша район пуçлăхĕ И.В. Николаев та, район администрацийĕн пуçлăхĕ Ю.А. Иванов та, «Моргаушская» чăх-чĕп фабрикин ертÿçи Н.Г. Ванеркин та палăртрĕç. Çакна пурнăç та кăтартса парать.
Н. Николаева.
Сăн ÿкерчĕкре: Н. Охотниковăпа В. Соколова пулас чемпионсемпе.