24 сентября 2011 г.
Яла çĕнĕ техника килет
Районти ял хуçалăх производство кооперативĕсемпе хресчен (фермер) хуçалăхĕсен машинăпа трактор паркĕ çĕнелсех пырать. Çакă районти производство интенсивлăхне, ĕç продуктивлăхне, механизаторсен ĕç условийĕсене лайăхлатса çĕнĕ аталану шайне çĕкленме пулăшать.
Муркаш енре ял хуçалăх техники çĕнелсе пынине унчченхи техника хатĕрĕсем «ватăлса» çитнипе çеç сăлтавламалла мар. Пирĕн çĕр ĕçченĕсем те аграри наукин çĕнĕлĕхĕсене пурнăçа кĕртме тăрăшаççĕ. Çак çулпа кайса пĕчĕк тăкаксемпех производствăн пысăкрах картлашкисене çĕнме тăрăшаççĕ.
Иртсе пыракан ял хуçалăх çулĕ те ял хуçалăхĕнче ĕçлемелли çĕнĕ техника туянассипе пирĕн хуçалăхсем рекордлă укçа-тенкĕ тăккаланине çирĕплетрĕ. Кăрлач–çурла уйăхĕсенче агропромышленность комплексĕн районти предприятийĕсем ял хуçалăх техникине 65 миллион тенкĕлĕх 62 единица туяннă. Вĕсенчен 20-шĕ – тракторсем, 2-шĕ – тиев турттармалли автомашинăсем, 3-шĕ – «хир карапĕсем», 4-шĕ – тымар çимĕç пухмалли агрегатсем, 2-шĕ – çĕр улми кăлармалли комбайнсем. Ыттисем – ял хуçалăх машинисем.
Ял хуçалăх техникине çĕнетессипе тата çĕнĕ технологипе ĕçлемелли оборудованисем туянассипе Е. Андреев яч. хис., «Оринино», «Свобода» хуçалăхсемпе «Путь Ильича» агрофирма тата «ВаСем» чикĕллĕ яваплăхлă общество нумай ĕçлерĕç. «Путь Ильича» агрофирма, тĕслĕхрен, пирĕн районта халиччен пулман трактор туянчĕ. Вăл Канадăра туса кăларнă 375 лаша вăйĕллĕ трактор. «ВаСем» чикĕллĕ яваплăхлă общество икĕ «Палессе» «хир карапĕпе» çĕр улми кăлармалли икĕ комбайн туянни те районти техника хăватне ÿстерчĕ кăна.
Çĕнĕ техника сĕрмелли-çунтармалли материалсен тăкакне чакарни, ял хуçалăх продукцийĕн хăй хаклăхне пĕчĕклетни, çак çулпа пыни хуçалăхсен экономика хăватне ÿстерни никамшăн та вăрттăнлăх мар.
А. БЕЛОВ.