21 сентября 2011 г.
Чи пĕлтерĕшли – пĕрлехи тĕллев
Авăн уйăхĕн 19-мĕшĕ тĕлне пирĕн район территорийĕнче эпир 29 пушар регистрацилерĕмĕр. Вĕсенче миллионшар тенкĕлĕх пурлăх кĕлленнипе пĕрлех пушар хăрушсăрлăх правилисене пăсни 3 çыннăн пурнăçне вăхăтсăр татрĕ. Танлаштарма, иртнĕ çулхи çак тапхăрта та районта 29 пушар алхаснăччĕ, вĕсенче 2 çын вилнĕччĕ.
Паян пушар хуралĕнче кунĕн-çĕрĕн вăй хуракансем çĕршер çул ĕлĕкрех йĕркеленнĕ ырă йăласене самантлăха та манăçа кăлармасăр малалла аталантарса, пуянлатса пыраççĕ. Çакă пирĕн ответлăха ÿстернĕрен эпир хамăрăн тĕп тивĕçсене те ăнланатпăр. Ăна тĕпе хурса хамăр ĕçсене «Пушар хуралĕ çинчен» Федераллă Саккунпа килĕшÿллĕн йĕркелесе пыратпăр, официаллă статистика учетне тăватпăр, объектсене пушар хăрушсăрлăхĕпе тивĕçтерме ĕç тăвакан влаçăн федераллă органĕсемпе, РФ субъекчĕсен ĕç тăвакан органĕсемпе, вырăнсенчи ĕç тăвакан органсемпе, обществăлла организацисемпе тата пĕрлешÿсемпе тачă çыхăнса ĕçлетпĕр, пушар хăрушсăрлăхĕпе граждансемпе организацисен ыйтăвĕсене пăхса тухатпăр. Куратăр ĕнтĕ, ку ĕç пĕччен пурнăçламалли çул-йĕр мар. Кунта эпир пĕрле пулсан, пĕр тĕллевпе малашлăха шанса ĕçлесен çеç хамăр тăрăшулăха çулăма парассинчен сыхласа хăварăпăр. Çакна тусан çеç пирĕн малашлăх пулĕ, çулсем иртсен атте-аннесем тунине сыхласа хăварнăран хамăр ачамăрсене хăюллăнах куçран пăхма пултарăпăр.
Раççейре ĕлĕк-авалтанпах çулăмпа кĕрешекенĕн ĕçне хакланă, хăйне те хисепленĕ. Пушар хурал историйĕ кунта ĕçлекенсем кăтартнă паттăрлăхсене нумай пĕлет, кашнинех асра тытать, çав тĕслĕхсем çинче пушарнăйсен çĕнĕ ăрăвне воспитани парать. Муркашри пушар хуралĕ те çакăнтан айккинче тăмасть. Паян 37-мĕш пушар чаçĕпе унăн Мăн Сĕнтĕрте тата Шомикри психикăпа неврологи интернатĕнче вырнаçнă уйрăм посчĕсем пĕтĕм районшăн яваплă пулайманнине пурте ăнланатпăр. Çавăнпа та «Моргаушская» чăх-чĕп фабрики, «Ударник», «Герой», «Свобода», Суворов ячĕпе хисепленекен ял хуçалăх предприятийĕсем ирĕклĕ пушар хуралĕн командисене тытнине ырлатăп кăна.
Раççейре пушар хăрушсăрлăхĕ çине тимлĕх уйăрнин пĕр тĕслĕхĕпе паллаштарам-ха. Кăçал Раççей Федерацийĕн Оборона министерстви пирĕн районти Юнкă тата Оринин ял тăрăхĕсене икĕ «АРС» автомашина (раздатка станцийĕн автомобилĕсем) уйăрса пачĕ. Тăрăшсан ку автомашинăсенчен çăмăллăнах пушар сÿнтермелли автоцистернăсем йĕркелеме пулать. Юнкă ял тăрăхĕн пуçлăхĕ В. Фомин çапла турĕ те. Пушар хуралĕ валли мотопомпа туянса утă уйăхĕн 6-мĕшĕнчи йышăнăвĕпе вăл «Моргаушская» МСО территорийĕнче ирĕклĕ пушар хуралĕ йĕркелерĕ. Çапла вара кăçалччен эпир ку тăрăха пушар хуралĕпе «витейменни» умран сирĕлчĕ. Çак машина юлашки кунсенче çеç 3 пушара тухма пултарни нумай йывăрлăха иккĕмĕш вырăна хăварчĕ.
Çакнашкал тепĕр автомашина Оринин ял тăрăхне лекрĕ, анчах кунта çакăн пĕлтерĕшне ăнлансах илмерĕç курăнать. Пушар хуралĕ валли килнĕ автомашина паян та «ĕçсĕр» ларать. Ăна пушар сÿнтерме йĕркелемесен автомашинăшăн хĕл кунĕсем питех те йывăр килесси паллă. Кунпа пĕрлех ăна районтан илсе каяс ыйту та тухма пултарать. Çакă вара аталану çулĕнчен пăрăнман Муркаш районĕшĕн пысăк çухату пулнă пулĕччĕ.
Муркашри 37-мĕш номерлĕ пушар чаçĕпе унăн Мăн Сĕнтĕрти тата Шомикри психикăпа неврологи интернатĕнче вырнаçнă уйрăм посчĕсенче куллен службăна тухакан пушарнăйсем хăйсене шанса панă пушар машинисене кирек хăçан та рейса тухма юсавлă тытаççĕ. Вĕсем хăйсен ĕçĕ çине ответлăха туйса пăхнăран пулăшу ыйтакансем патне тухакан машина ĕçлеме пултарайманни пулман. Службăра тăракан караул та чĕннĕ вырăна яланах вăхăтра çитет, тивĕçлĕ пулăшу парать. Пушарнăйсем хăйсен тĕп тивĕçне çулăма сÿнтернинче çеç мар, çынсен пурнăçне тата вĕсен пурлăхне сыхласа хăварнинче те кураççĕ.
И. СМИРНОВ,
районти 37-мĕш
номерлĕ пушар чаçĕн пуçлăхĕ.