17 сентября 2011 г.
Муркашсем каллех малта
Республикăра çулленех ялсене тирпей-илем кĕртессипе смотр-конкурс йĕркелеççĕ. Кăçал унăн итогĕсене республикăри смотр-конкурс итогĕсене пĕтĕмлетекен ведомствăсем хушшинчи комисси ларăвĕнче пĕтĕмлетнĕ. Лару ĕçне район администрацийĕн пуçлăхĕ Юрий Александрович Иванов та хутшăннă.
Республикăри смотр-конкурса ирттересси пирки кăçалхи май уйăхĕнче пĕлтернĕ. Унта хутшăнма Чăваш Республикин Градостроительство тата обществăлла инфраструктурăна аталантарассин министерствине материалсене Муркаш ял тăрăхĕ те тăратнă.
«Чăваш Республикинчи ялсене симĕслетесси тата тирпей-илем кĕртесси» номинацире район центрĕ пулса тăракан Муркаш ялĕ 2-мĕш категорипе 1-мĕш вырăн çĕнсе илнĕ. 2-мĕш вырăнта Елчĕк районĕнчи Патреккел ялĕ. 3-мĕш вырăна комисси членĕсем Çĕрпÿ районĕнчи Çĕрпÿ хулине пама йышăннă.
Çавна палăртма кăмăллă. Муркаш ялĕн урамĕсем çулран çул илемлĕрех те илемлĕрех. Çуркуннерен тытăнса кĕрхи кунсемчченех урамсенче тĕрлĕ тĕслĕ чечексем куçа илĕртеççĕ. Муркаш урамĕсенче вара чечексем 2008 çулта, районта Республика кунне ирттернĕ чухне ешерме тытăнчĕç. Çавăн чухнех ĕнтĕ ялсене симĕслетес тата тирпей-илем кĕртес енĕпе ирттерекен республикăри смотр-конкурсра Муркаш ялĕ районсем хушшинче 1-мĕш вырăн çĕнсе илчĕ.
Çавăнтан тытăнсах чечексем кунта пурăнакансен тата хăнасен куçĕсене тыткăнлаççĕ. «Чечексемпе хăтлăрах та илемлĕрех. Вĕсемсĕр малашне май çук та ĕнтĕ»,– теççĕ район центрĕнче пурăнакансем хăйсем те.
Урамсенче йĕркеллĕ те хăтлă пултăр тесе тăтăшах субботниксем ирттерессине йĕркене кĕртнĕ. Унта шкул ачисене, предприятисемпе организацисенче ĕçлекенсене, ялта пурăнакансене явăçтараççĕ.
Хамăр инф.