14 сентября 2011 г.
Ĕмĕрлĕх асра юлмалли тĕл пулу
2011 çул тĕрлĕ мероприятипе пуян. Кăçал çын уçлăха вĕçнĕренпе 50 çул çитнине тĕнчипех тĕрлĕрен паллă тăваççĕ. Пирĕн çĕр-шывра тата Космонавтика çулталăкĕ те.
Акă Андриян Григорьевич Николаев летчик-космонавт пурăннă пулсан сентябрĕн 5-мĕшĕнче 82 çул тултарнă пулĕччĕ. Çак паллă куна сума суса, асăнса Чăваш çĕрне пирĕн паллă ентешĕн хĕрĕ Елена Андрияновна Терешкова мăшăрĕпе килсе çитрĕ.
Сентябрĕн 7-мĕшĕнче вара Ильинкăри вăтам шкулти 2–5 классенче вĕренекенсем А.Г. Николаевăн мемориал комплексĕнче пулса курчĕç. Çак кун унта шăпах космос вĕçевĕсене хутшăнакансен конгресĕн делегацийĕ те пулчĕ. Çапла вара шкул ачисем тĕнчипе паллă çынсемпе тĕл пулчĕç: В. Горбатко летчик-космонавт, икĕ хутчен Совет Сюзĕн Геройĕ, Болгари космонавчĕ Г. Иванов, Монголи космонавчĕ Г. Жугдэрдэмидийн, С. Королев академикăн хĕрĕ Н. Королева, Г. Титов летчик-космонавтăн мăшăрĕ Т. Титова чăваш космонавчĕ çинчен питĕ ăшшăн асăнчĕç.
Хăшĕсем кунти Космонавтсен аллейинче хăйсен ячĕпе чăрăшсем те лартса хăварчĕç. А. Николаевăн музей çуртĕнче шкул ачисем паллă хăнасемпе пĕрле экспонатсемпе паллашрĕç, асăнмалăх сăн ÿкерĕнчĕç. Ку çул çÿрев вĕренекенсен асĕнче, паллах, ĕмĕрлĕхех юлĕ.
И. Каргин.
Ильинкăри вăтам шкул.