14 сентября 2011 г.
Сакăр уйăх хыçа юлчĕ
Ял хуçалăх тата промышленность предприятийĕсем, продукци тирпейлекен предприятисем кăçалхи январь-август уйăхĕсенче 1 миллиард та 230 миллион тенкĕлĕх продукци туса кăларнă. Ку вăл иртнĕ çулхи çав вăхăтринчен 31,8 процент нумайрах. Асăннă шутра ял хуçалăх предприятийĕсен тÿпи 20,2 процент, ытти 79,8 проценчĕ – промышленность тата продукци тирпейлекен предприятисен тÿпи.
Пĕтĕмĕшле продукци туса кăларнин калăпăшĕнче «Сеспель» акционерсен хупă обществин тÿпи 53,5 процент йышăнать. Муркашри кирпĕч завочĕн вăл 1,9 процент, «Моргаушское» пурăнмалли çурт-йĕрпе коммуналлă хуçалăх предприятийĕн 1,2 процент, «Сундырское» пурăнмалли çурт-йĕрпе коммуналлă хуçалăх предприятийĕн 0,9 процент.
Ваккăн тавар сутассин калăпăшĕ çулталăк пуçланнăранпа 514,5 миллион тенкĕпе танлашнă. Ку вăл иртнĕ çулхи çав вăхăтринчен 17,8 процент пысăкрах.
Тÿлевлĕ пулăшусем çав тапхăртах 47,2 миллион тенкĕлĕх панă. Ку кăтарту пĕлтĕрхи çав вăхăтринчен 5 процент ÿснĕ.
2011 çулхи сакăр уйăхра инвестици ĕçне-хĕлне аталантарма пĕтĕмпе 264,8 миллион тенкĕ уйăрнă. Иртнĕ çулхи çав вăхăтрипе танлаштарсан ку вăл 103,8 процент пулать.
Кăçалхи январь–август уйăхĕсенче районĕпе 3 пин тонна аш-какай туса илнĕ. Иртнĕ çулхи çав вăхăтринчен ку вăл 1 процент нумайрах. Сĕт туса илесси 4 процент чакнă, пĕтĕмпе ăна 28,6 пин тонна туса илнĕ. Çăмарта 50 миллион та 733 пин штук туса илнĕ. Ку вăл иртнĕ çулхи çав вăхăтрипе танлаштарсан 120,2 процент пулать.
Усă куракан кашни 100 гектар çĕр пуçне аш-какай туса илесси 47,9 центнерпа (иртнĕ çулхипе танлаштарсан 101 процент), сĕт туса илесси 453,9 центнерпа (96 процент) танлашнă.
Э. СИМАКОВА,
район администрацийĕн экономика пайĕн пуçлăхĕ.