07 сентября 2011 г.
Ăсталăхпа Муркашсем палăрчĕç
Сочи хули çывăхĕнчи Лоо поселокра «Ăстасен хули – Сочи-2011» Пĕтĕм Раççейри иккĕмĕш конкурс иртрĕ. Ăна ача-пăчана профессиллĕ ал ĕçне тата ку тĕлĕшри ытти йывăрлăха çĕнтерме, харпăр хăйне тĕрлĕ енлĕ аталантарма хăнăхтарас тĕллевпе йĕркеленĕ.
Чăваш Ен чысне Муркашри ача-пăча пултарулăх çурчĕн вĕренекенĕсем Светлана Рожкова, Елизавета Порфирьева (Муркаш шкулĕ), Елена Порфирьева (Муркаш лицейĕ) хÿтĕлеме тивĕç пулчĕç.Унта вĕсем тĕрлĕ ăсталăхпа паллашрĕç, ытти тăрăхри педагогсем мастер-классем ирттерчĕç. Конкурс вĕçĕнче вара кашни вĕренекен хăй ăсталăхĕпе, пултарулăхĕпе паллаштарчĕ. Çак пысăк пĕлтерĕшлĕ конкурс Мускав тата ытти тăрăхри ачасене пĕрлештерчĕ, ăс-тăн шайне тĕрĕслерĕ.
Пирĕн район вĕренекенĕсем вара тăван тăрăха пушă алăсемпе таврăнмарĕç. Елена Порфирьева виççĕмĕш вырăна тивĕçрĕ, Светлана Рожкова (чи çамрăк хутшăнакан), Елизавета Порфирьева дипломсемпе таврăнчĕç. Çавăн пекех кашни хутшăнакан асăнмалăх парнене, медале тивĕç пулчĕ. Чи пĕлтерĕшли вара – тавракурăма анлăлатни. Район шайĕнче иртекен семинарсенче унта алла илнĕ «Торсион» техникипе паллаштарĕç.
Çавăн пекех çÿлерех асăннă конкурс шайĕнче вĕрентекенсен слечĕ пулчĕ. Унта Н.А. Порфирьева («Путене» ача сачĕн воспитателĕ), А.В. Рожкова (районти ача-пăча пултарулăх çурчĕн директорĕ) медальсене тивĕçрĕç. Иртнĕ çулхи пĕрремĕш конкурса та вĕсем хутшăннăччĕ. Çÿлерех асăннă конкурса «Планета эрудичĕсем» проект тăрăх йĕркеленĕ.
А. Рожкова,
районти ача-пăча пултарулăх çурчĕн директорĕ.