07 сентября 2011 г.
Космонавт ячĕпе – палăк
Чăваш Республикин Хисеплĕ гражданинĕ Андриян Григорьевич Николаев çуралнă кун Шупашкарта палăк уçăлнă.
Шăп 49 çул каялла, 1962 çулхи çурла уйăхĕн 11-мĕшĕнче, А.Г. Николаев тĕнче уçлăхне вĕçнĕ. Сакăр çултан, 1970 çулхи утă уйăхĕнче, вăл космоса тепĕр хут парăнтарнă, уçлăхра 17 талăк та 17 сехет пулнă. Ку вăл ун чухне чи вăрăмми шутланнă.
Чăваш çĕрĕнче çуралнă виççĕмĕш номерлĕ космонавт наци паттăрĕ кăна мар, пĕтĕм тĕнче пĕлекен тата юратакан çын пулса тăнă. Пирĕн ентеш хăйĕн пархатарлă ĕçĕсемпе Раççейĕн тата ют çĕр-шывсен вун-вун наградине тивĕçнĕ. Чăваш Енĕн Паттăрлăхпа Ĕç Мухтавĕн Хисеплĕ кĕнекине унăн хушаматне чи малтан кĕртнĕ.
Андриян Григорьевич Николаев – пирĕн республикăн, Калуга, Каспийск, Махачкала, Нальчик, Ржев, Смоленск, Гюмри, Караганда, Дархан, София, Варна, Петрич, Плавен, Карлова Вары, Буир хулисен Хисеплĕ гражданинĕ. Уйăхăн тепĕр енчи кратерĕ, Франци Иосиф çĕрĕн архипелаг çинчи пăрлă куполĕ, Антарктидăри ту хысакĕ, пăрахутсем, нумай-нумай урампа шкул, çамрăк космонавтсен отрячĕ Чăваш Енĕн çăлтăрлă ывăлĕн ячĕпе хисепленсе тăраççĕ.
Авăн уйăхĕн 5-мĕшĕнче, СССР летчик-космонавчĕ, авиацин генерал-майорĕ, Совет Союзĕн икĕ хут Геройĕ, Чăваш Республикин Хисеплĕ гражданинĕ Андриян Григорьевич Николаев çуралнă кун, Шупашкарта унăн палăкĕ уçăлнă. Паллă пулăма Чăваш Республикин Президенчĕ Михаил Игнатьев, космонавтăн пĕртен-пĕр хĕрĕ Елена Терешкова тата ытти сумлă хăнасем пуçтарăннă. Çак монумент– Космонавтика скверĕн пуçламăшĕ пулса тăрать. Вăл пирĕн ентешĕмĕрĕн пархатарлă ĕçĕсемпе паттăрлăхне кăтартакан символ пулса тăрĕ.