31 августа 2011 г.
Хваттерсем хăтлă пулĕç
Чăваш Республикин Министрсен Кабинечĕн çурла уйăхĕн 17-мĕшĕнчи 333-мĕш хушăвĕпе килĕшÿллĕн нумай хваттерлĕ çуртсене тĕпрен юсама патшалăх корпорацийĕн – Пурăнмалли çурт-йĕрпе коммуналлă хуçалăха реформăлама пулăшакан фондран тата республика бюджетĕнчен 2011 çулта муниципалитетсене мĕн чухлĕ укçа-тенкĕ уйăрассине палăртрĕç. Çапла вара Муркаш районĕнчи нумай хваттерлĕ сакăр çурта тĕпрен юсамашкăн уйăрма пăхнă субсиди калăпăшĕ 7865280 тенкĕпе танлашать. Субсиди çак пайсенчен тăрать: 4500000 тенкĕ патшалăх корпорацийĕнчи – Пурăнмалли çурт-йĕрпе коммуналлă хуçалăха реформăламалли фондри укçа-тенкĕ, 1485634 тенкĕ республика бюджетĕнчен, 1485634 тенкĕ район бюджетĕнчен, 394012 тенкĕ харпăр хăй укçи-тенки.
Çапла вара «2011 çулта Чăваш Республикин территорийĕнче нумай хваттерлĕ çуртсене тĕпрен юсасси» тĕллевлĕ программа ку тĕлĕшпе ĕçлет. Йышăнăва пурнăçа кĕртнине Чăваш Республикин Строительство министерстви тĕрĕслесе тăрĕ.
Районта халĕ нумай хваттерлĕ çуртсене тĕпрен юсас тĕлĕшпе ертсе пыракан компани конкурс ирттернĕ. Çавна май подрядчиксем те паллă. Çитес вăхăтра вĕсем юсав ĕçĕсене пуçăнĕç.
Р. Илларионова.