27 августа 2011 г.
Сире хапăл туса кĕтетпĕр!
Кашни шкул ачиех вĕрентекеншĕн пысăк пĕлтерĕшлĕ. Вĕренекен шкул тенкелĕпе сыв пуллашрĕ пулин те, учитель унăн малашнехи пурнăçĕпе тăтăшах кăсăкланать. Пăшăрханмалли пулсан вара пĕрле кулянать, хуйхи-сухине пĕрле пайлама тăрăшать. Вăл е ку кăлтăк сăлтавне шкул коллективĕ пĕрле сÿтсе явать. Енчен те вĕренекен пысăк çитĕнÿсем туса çÿллĕ шая çĕкленчĕ пулсан, пур ĕçтеш хăй вĕренекенĕпе хăпартланать, ыттисем умĕнче тĕслĕхе лартать. Акă «Сывлăх» физкультурăпа спорт комплексĕнче вырнаçнă ачасене хушма пĕлÿ паракан «Ф.С. Васильев ячĕллĕ Муркашри искусство шкулĕ» муниципаллă автономи вĕрентÿ учрежденийĕ чылай вĕренекене пурнăç çулĕ çине тăратрĕ. Шкул ĕçĕ-хĕлĕпе тĕплĕнрех паллашас тĕллевпе эпĕ унăн ертÿçине Г.М. Анисовăна калаçăва чĕнтĕм.
– Галина Михайловна, сирĕн шукул коллекивĕ чылай вĕренекене пурнăçăн аслă çулĕ çине анлă пĕлÿпе ăсатрĕ, паллă çынсем турĕ. Коллективăн ăсталăх вăрттăнлăхĕпе паллаштарсамăр тархасшăн?
– Паллах, кунта пысăк вăрттăнлăхах çук. Чи пĕлтерĕшли – пирĕн ĕçре кашни вĕрентекен кашни ача патне тулли кăмăлпа, пысăк ăсталăхпа туртăнни. Коллектив кашни вĕренекене хапăл туса йышăнать.
Пирĕн шкул 46 çул ĕнтĕ хăй ĕçне тулли кăмăлпа пурнăçлать. Çак тапхăрта 500 ытла вĕренекене юрă-ташă, сăрă, ÿнер ĕçне тата ытти ăсталăха вĕрентнĕ. Кунта вĕренекенсем ăс-тăн шайне татах та анлăрах тăвассишĕн тимлеççĕ. Хăшĕ тĕрлĕ музыка инструменчĕпе выляма хăнăхать, тепри вара паллă ÿнерçĕсен ÿкерчĕкĕсемпе тарăнрах паллашть, вĕсенчен ăсталăха вĕренет тата ытти те. Паллах, ачашăн çакăн пек аталану питĕ кирлĕ. Кашни ачан хăйне тĕрлĕ енлĕ аталантармалла, паянхи пурнăçра çакă уйрăмах пысăк пĕлтерĕшлĕ. Хăш-пĕр вĕренекен кунтан вĕренсе тухнă хыççăн тăван кĕтесех таврăнать, малашне те хăй ĕç-хĕлне пирĕн шкулпа çыхăнтарать. Акă, фортепиано ăсталăхне вĕрентекен Л.Н. Ефимова, хореографи преподавателĕ О.В. Григорьева кунтах ĕçлеççĕ. В. Александров, А. Макаров Культура çурчĕсенче халăх ансамблĕсене ертсе пыраççĕ.
1985 çулта пирĕн патран фортепиано ăсталăхне вĕренсе тухнă, Пĕрремĕш Май выççăлккинче çуралса ÿснĕ Николай Дементьев Халăхсем хушшинчи искусство олимпиадинче лауреат пулса тăчĕ. Унăн репертуарĕнче ытларах чăваш, вырăс акăлчан халăх юррисем. Паллах, пире çак çитĕнÿ питĕ савăнтарать. Ашшĕ-амăшĕ пĕчĕк Кольăна пирĕн шкула илсе килнĕ чухне çакăн пек пуласса ĕмĕтленме пултарнă-ши-ха; Юрă-кĕвĕ тĕнчине парăннă яш çар ретĕнче пулнă хыççăн Гнесин ячĕпе хисепленекен музыка училищинче вĕреннĕ.
Искусство шкулĕ кăçал та музыка (фортепиано, баян, аккордеон, гитара), хореографи, художество, вокал уйрăмĕсенче вĕренес текенсене йыхравлать. 6 çултан пуçласа 8 çулхисем валли пĕтĕмĕшле эстетика пĕлĕвĕн уйрăмĕ ĕçлет. Кунта килекенсем искусствăн пĕрремĕш утăмĕсемпе паллашĕç.
Августăн 26, 30, 31-мĕшĕсенче 13 сехетрен пуçласа 17 сехетчен тÿлевсĕр хатĕрлев курсĕ ĕçлет, çавăн пекех ашшĕ-амăшĕсемпе калаçу иртет. Сентябрĕн 3-мĕшĕнче 10 сехетрен пуçласа 17 сехетчен Уçă алăксен кунĕ пулать. Кунта килме кăмăл тăвакансем вĕренÿ условийĕсемпе, шкул ĕçĕ-хĕлĕпе çывăхрах паллашма пултараççĕ. Пирĕн шкул «Сывлăх» физкультурăпа спорт комплексĕн иккĕмĕш хутĕнче вырнаçнă. Çавăн пекех Мăн Сĕнтĕрте, Москакассинче, Ярапайкассинче, Кашмашра, Тойкилтĕре пирĕн филиалсем ĕçлеççĕ. Тĕплĕнрех 63-0-22 е 8-905-347-70-79 номерсемпе шăнкăравласа пĕлме пулать.
Р. Илларионова калаçнă.