27 августа 2011 г.
Вырма ĕçĕсем вĕçленсе пыраççĕ
Районти уй-хирсенче вырма ĕçĕсем вĕçленсе пыраççĕ. Район администрацийĕн ял хуçалăх пайĕн оперативлă даннăйĕсем тăрăх ĕнерхи кун тĕлне тĕш тырă культурисене пĕтĕмпе 10944 гектар çинче вырса çапнă. Ку вăл планпа пăхнин 72,7 проценчĕ пулать. Чикĕллĕ яваплăхлă «ДаАн», «Бездна» обществăсем, В.В. Горбуновăн хресчен (фермер) хуçалăхĕ вырма ĕçĕсене вĕçленĕ. Çав вăхăтрах «Путь Ильича» агрофирмăра, «Передовик» хуçалăхра вырма ĕçĕсен хăвăртлăхĕ пĕчĕк.
Тĕш тырăсене пĕтĕмпе 28440 тонна çапса тĕшĕленĕ. Тухăç гектар пуçне вăтамран 26 центнерпа танлашать. Пĕр гектар пуçне тырă 30 центнер е ытларах та çапса тĕшĕлекенсем шутĕнче Е. Андреев яч. хис., Ильич яч. хис., Суворов яч. хис., «Ударник», Чкалов яч. хис. хуçалăхсем, чикĕллĕ яваплăхлă «Бездна» общество тата С.К. Сретинскийăн хресчен (фермер) хуçалăхĕ.
Улăма 8435 гектар çинчен (çапса тĕшĕленин 77 проценчĕ) пухса тирпейленĕ. «Герой», «Свобода» хуçалăхсенче ку ĕç тивĕçлĕ шайра мар.
«Восток», Ильич яч. хис. хуçалăхсенче çĕртме сухи тăвас ĕçсене тытăннă.
Район уй-хирĕсенче ĕнер 46 комбайн ĕçленĕ.
Кĕрхи культурăсем акма 3736 гектар (57 процент) çĕр хатĕрленĕ. «Путь Ильича» агрофирма ку енĕпе плана 160 процент, Суворов яч. хис. хуçалăх 115 процент, Мичурин яч. хис. агрофирма 90 процент тултарнă.
«Восток» (80 гектар), Ильич яч. хис. (15 гектар), «Оринино» (28 гектар), «Свобода» (30 гектар), Суворов яч. хис. (70 гектар), Чкалов яч. хис. (50 гектар) хуçалăхсенче, чикĕллĕ яваплăхлă «ВаСем» (100 гектар), «Колос» (40 гектар) обществăсенче, А.А. Афанасьевăн хресчен (фермер) хуçалăхĕнче (120 гектар) кĕрхи культурăсем акаççĕ.
Обществăлла выльăх-чĕрлĕхе хĕл каçарма апат хатĕрлесе хăварас ĕçсем те пыраççĕ. Çак вăхăта нумай çул ÿсекен курăксене иккĕмĕш хут 685 гектар çинче (12 процент), пĕр çул ÿсекен курăксене 1691 гектар (95 процент) çулнă. Утă 8422 тонна (153 процент), сенаж 13439 тонна (204 процент), силос 16783 тонна (93 процент) янтăласа хăварнă.