20 августа 2011 г.
Района аталантармалли çĕнĕ тĕллевсене палăртрĕ
Августăн 18-мĕшĕнче Чăваш Республикин Президенчĕ М.В. Игнатьев ĕçлĕ çул çÿревпе Муркаш районĕнче пулчĕ. Районта республика ертÿçи вырма ĕçĕсемпе, çĕнĕ вĕренÿ çулне епле хатĕрленнипе интересленчĕ, ялта пурăнакан предпринимательсемпе курса калаçрĕ, муниципалитета аталанма май паракан çул-йĕрсене пăхса тухса малашнехи тĕллевсене палăртрĕ.
Ĕçлĕ çул çÿрев Сĕнтĕрте вырнаçнă чикĕллĕ яваплăхлă «Сундырь-хлеб» обществăран пуçланчĕ. «Мĕн хакпа сутатăр çăкăра;»– çак ыйтăва чи малтан пачĕ Михаил Васильевич. «Орловский» çăкăр тата «Простой» батон – 12-шер тенкĕпе»,– хурав пулчĕ предприяти директорĕн Л.Г. Ильгечкинăн.
Ку предприяти ăнăçлă ĕçлекенсенчен пĕри. 1965 çулта йĕркеленĕ предприятире паян 74 çын тăрăшать. Предприяти кунсерен 6,6 тонна çăкăрпа ытти продукци туса кăларать. Ĕçлекенсен уйăхри вăтам ĕç укçин шайĕ 10 пин те 300 тенкĕпе танлашать.
Республика ертÿçи çăкăр пĕçерекен цехра пулса курчĕ, унта вăй хуракансемпе калаçрĕ. Леонид Ильгечкин ертÿçĕ малашнехи тĕллевсемпе паллаштарчĕ, хăйсен продукцине малашне Шупашкар тата Мари Эл пасарĕсенче те вырнаçтарма шухăш пурри пирки пĕлтерчĕ.
Михаил Васильевич Мăн Сĕнтĕрте пурăнакан çынсемпе калаçрĕ, вĕсене кăсăклантаракан ыйтусем çине хуравсем пачĕ. Президент Мăн Сĕнтĕрте ялта чÿречесемпе алăксене пластикран туса хатĕрлекен производствăпа та паллашрĕ. Çак ĕçе кунта Шупашкарти «Карина» фирма йĕркеленĕ. Ку фирма шкулсене, больницăсене пластикран тунă паха продукципе тивĕçтерсе тăрать. Район администрацийĕпе килĕштерсе ĕçлесе пынине те палăртса хăварчĕ Игорь Каринкин ертÿçĕ. «Паян ялсенче çакăн пек предприятисем уçăлни питĕ аван. Вĕсене май килнĕ таран пулăшма тăрăшмалла. Вĕсем тăрăшнипе тавралăхри пăрахăçа тухнă çĕр лаптăкĕсем те илемленеççĕ»,– палăртрĕ Михаил Васильевич.
Хыççăн Чăваш Республикин Президенчĕ Мăн Сĕнтĕрти пĕтĕмĕшле пĕлÿ паракан вăтам шкулта та пулса курчĕ, ăна çĕнĕ вĕренÿ çулне епле хатĕрлесе çитернипе интересленчĕ. Тепĕр икĕ эрнерен 43 ача пĕрремĕш хут парта хушшине ларĕç. Пĕтĕмпе вара çĕнĕ вĕренÿ çулне 351 ача килмелле. Михаил Игнатьев физика, хими тата ытти хăш-пĕр предметсемпе уроксем ирттермелли кабинетсене пăхса çаврăнчĕ. Классем пĕтĕмпех хатĕр, вĕсене кирлĕ хатĕрсемпе тивĕçтернĕ. Вĕрентÿ ĕçченĕсем хальхи пурнăçпа тан пыма тăрăшаççĕ, кашни учителĕн хăйĕн сайчĕ пур.
Пĕрлешÿллĕ хуçалăхсенче кĕрхи уй-хир ĕçĕсем анлă сарăлнă. Михаил Васильевич «Оринино» хуçалăх хирĕпе юнашар иртсе пынă май тырă акакансем патĕнче чарăнма кăмăл турĕ. Тырă акакансемпе калаçнă май кĕр аки планĕсемпе интересленчĕ. Халĕ кунта «Безенчукская-87» ыраш акаççĕ. 7 гектар акма ĕлкĕрнĕ. Хуçалăхĕпе вара кĕрхи культура пĕтĕмпе кăçал 410 гектар йышăнмалла.
Муркаш ялĕнче Михаил Васильевич 48 хваттерлĕ çурт тунă çĕрте пулчĕ. Ку объекта кăçал хута яма палăртнă. Хваттерсемпе чи малтанх ветерансене, тăлăха юлнă салтак арăмĕсене тата çамрăк специалистсене тивĕçтерĕç.
Çула май Президент «Универмаг» чикĕллĕ яваплăхлă обществăна та кĕрсе тухрĕ. Кунта вăл таварсен ассортименчĕпе, вĕсен хакĕпе интересленчĕ. «Вырăнти тавар туса кăларакансене пулăшма тăрăшмалла»,– палăртрĕ Михаил Васильевич.
Михаил Игнатьев район администрацийĕн ларусен залĕнче районти хуçалăх активĕпе Муркаш районĕн социаллă пурнăçĕпе экономика аталанăвĕн кăçалхи 7 уйăхри кăтартăвĕсем тăрăх анлă канашлу ирттерчĕ. Кăçалхи январь–июль уйăхĕсен итогĕсемпе район администрацийĕн пуçлăхĕ Ю.А. Иванов паллаштарчĕ.
Хăй тĕллĕн çÿрекен тата ытти йышши техника хатĕрĕсен техника шайне пăхса тăракан патшалăх инспекцийĕн пуçлăхĕ – республикăри тĕп патшалăх инженер-инспектор В.П. Димитриев районта аталану енĕпе ырă пулăмсем пулни çинче чарăннă май Чăваш Ен Президенчĕн «Çамрăксене шанмалла» Çырăвĕнче палăртнă задачăсене пурнăçа кĕртме пĕтĕмпех тума кирлине палăртрĕ.
ЧР экономика аталанăвĕн, промышленноç тата суту-илÿ министрĕн çумĕ Л.А. Петрова социаллă пĕлтерĕшлĕ продуктсен виçисене хăпартса ямалла марри çинче чарăнчĕ.
Атăлпа Вятка банкĕн правленийĕн председателĕн çумĕ – Раççей Перекет банкĕн Чăваш Республикинчи 8613 " уйрăмĕн управляющийĕ, ЧР Патшалăх Канашĕн депутачĕ В.Н. Александров тата акционерсен «Россельхозбанк» уçă обществин Чăваш регионĕнчи филиалĕн директорĕ И.Н. Письменская ял хуçалăх таварĕсем туса кăларакансене, фермерсене тата хушма хуçалăх тытакансене тивĕçтерекен çĕнĕ кредит мелĕсемпе паллаштарчĕç.
Хăйĕн сăмахĕнче республика Патшалăх Канашĕн Председателĕн çумĕ – культура, вĕрентÿ, наука, национальноç ĕçĕсен тата çамрăксен политикин комитечĕн председателĕ В.П. Мидуков район пурнăçĕнче палăракан ырă улшăнусене сыхласа хăварас тесен кирек хăш шайри влаç органĕсен те халăх ырлăх-пурлăхĕшĕн тăрăшассине хăйсен ĕçĕнче тĕп вырăна хумалли пирки каларĕ.
Умри тĕллевсемпе задачăсем çинче «Моргаушская» чăх-чĕп фабрики» ОАО директорĕ Н.Г. Ванеркин тата «Путь Ильича» агрофирма, «Муркашри сĕт завочĕ» ООО директорĕ О.А. Дельман чарăнса тăчĕç.
Канашлу итогĕсене пĕтĕмлетнĕ май республика Президенчĕ бюджет сферинче вăй хуракансен шалу шайне ÿстерме кирлине, шкул çулне çитмен ача-пăча учрежденийĕсемпе тивĕçтересси çине пысăк тимлĕх уйăрмаллине палăртрĕ, çĕр ĕçченĕсене хăйсен пархатарлă ĕçĕшĕн тав турĕ, ыйтусем çине хуравларĕ.
В. ШАПОШ