17 августа 2011 г.
Асăну кунне хутшăнчĕç
Çуллен августăн пĕрремĕш вырсарни кунĕнче республикăра çĕр-шывăн «хĕрÿ точкисенче» пуç хунисене асăнмалли куна паллă тăваççĕ. Ял тăрăхĕн территорийĕнчен çапăçусене хутшăнса Афганистанран Н.А. Перцев, Чечен Республикинчен Ф.Г. Вальков, Таджикистанран С.В. Мерлов килĕсене чĕррĕн таврăнайман.
Вилнĕ çамрăксен ашшĕ-амăшне – Тамара Петровнăпа Владимир Васильевич Мерловсене, Татьяна Николаевна Вальковăна тата Валентина Ивановна Перцевăна асăну кунне Шупашкара йыхравланă. Сып-сывă каччăна чĕррĕн кĕтсе илейменнин хуйхине мĕнпе виçме май пур-ши; Шел пулин те вĕсен шучĕ хушăнсах пырать.
Хăйсен ывăлĕсене салтак службинчен чĕррĕн кĕтсе илеймен ашшĕ-амăшĕ августăн 7-мĕшĕнче Шупашкарта «Çĕнтерÿ паркĕ» мемориал комплексĕ патĕнче пухăнчĕ. Асăну кунĕнче пухăннисем умĕнче салтак амăшĕсен республикăри комитечĕн председателĕ Л.И. Егорова, Чăваш Республикин Çар комиссарĕн ветерансемпе ĕçлессипе пулăшаканĕ А.П. Осипов, Шупашкар Çар комиссариачĕн пай пуçлăхĕн пулăшаканĕ А.В. Зурин сăмах каларĕç, вилнĕ çар çыннисен ашшĕ-амăшне чăннипех те çĕр-шыв гражданĕсене, хÿтĕлевçисене пăхса ÿстернишĕн тав турĕç.
Республикăн Çар комиссариачĕн Муркашпа Элĕк районĕсенчи пайĕн представителĕсем ертсе пынипе Муркашсем те хутшăнчĕç унта. Вилнĕ çар çыннисен ашшĕ-амăшĕсем, пиччĕшĕсемпе шăллĕсем, аппăшĕсемпе йăмăкĕсем, ачисем Чечен вăрçинче вилнисене, воин-интернационалистсене асăнса лартнă палăк, Мухтав монуменчĕ умне чĕрĕ чечексем хучĕç. Çĕнтерÿ паркĕнче часовня патĕнче «хĕрÿ точкăсенче» вилнисене асăнса панихида иртрĕ.
А. ХРАМОВА,
Тренккăри тĕслĕхлĕ библиотека библиотекарĕ.