13 августа 2011 г.
Çамрăксемшĕн – тĕслĕх те, юлташ та
Кăпасра пурăнакан Владимир Витальевич Михайлов аслă шкул хыççăнхи пĕлĕвĕпе инженер-механик пулнине шута илсен вăл паянхи уява питĕ çывăх тăмалла мар пек туйăнать. Анчах та спорта юратнипе, массăллă спорта ачасемпе çамрăксене явăçтарнипе вăл тепĕр профессионал физкультурникран ирттернине ăна пĕлекен кашни çын çирĕплетме пултарать. Çавăнпах Физкультурник кунĕнче вăл саламсем илме тивĕç те.
Кăпасри сакăр çул вĕренмелли шкул, Юнкăри вăтам шкул, ДОСААФ шкулĕ, Германири çар хĕсмечĕ – çапларах пулнă Владимир Витальевичăн «çын пуласси ачаран паллă» тенĕ çул. Каярах Горький хулинчи автотранспорт техникумĕнче, Чул хулари политехника университетĕнче пĕлÿ илнĕ çамрăк тăван колхозра инженер-механикра тăрăшнă.
Унăн пурнăçĕнче пĕр тапхăр тепринпе ылмашăннă, анчах та спорта вăл нимĕнпе те улăштарман. Футбол-и, полиатлон-и, хоккей-и... – пуринпе те кăсăкланнă. Хăй пĕлÿ пухнă вĕренÿ учрежденийĕсенче яланах пĕрлештернĕ спорт командисенче пулнă. Ытларах чухне тĕрлĕ ăмăртусене йĕкелекенĕ те. Футбол, хоккей, çăмăл атлетика енĕпе пĕрре мар район чемпионĕ пулса тăнă вăл. Чăваш Республикин çуллахи полиатлон енĕпе – бронза призерĕ те.
Паян Владимир Витальевич – уйрăм предприниматель. Унăн хăйĕн ĕçĕ. Çакăнпа пĕрлех вара Юнкă ял тăрăхĕнчи спорт фаначĕн ячĕ те ун çинчех.
Хăйĕн ывăлне футбол мечĕкне «тапма вĕрентнине» ялти ытти арçын ачасем те асăрханă. «Вова пичче, эпир те футболла выляма вĕренесшĕн», – тенĕскерсем вара паян футбол-хоккейра маттур. Халĕ те, çу кунĕсенче, каçсерен кашни эрнерех футбол матчĕсем иртеççĕ Юнкă ял тăрăхĕнче. Кун пекки пирĕн районта пур-ши татах; Çук тенине ĕненме çăмăлрах. Кăпасран, Ивановкăран, Юнкăпуçĕнчен тата ытти ялсемпе выçăлкăсенчен пухăнаççĕ çамрăксем. Паян вара вĕсен футбол вăййисен çĕнтерÿçине палăртакан ăмăрту иртет. Шăпах уяв кунĕнче.
Хĕлле вара Юнкăсем – хоккейра. Пăр курупкине те вырăнти тăрăшулăхпа туса лартрĕç. Шел те, тăрăшакансен хĕллехи тĕттĕмре пăра çутатса тăма май çук – электричество çутине çитерме укçа-тенкĕ енчен хĕсĕкрех-ха. Апла пулин те Юнкă тăрăхĕнчи çамрăксем хуйха ÿкмеççĕ: хастарскерсем районта та, республикăра та лайăх результатсем кăтартаççĕ.
Акă кĕçĕннисен ушкăнĕнче футболла выляссипе республика шайĕнчи ăмăртура пĕлтĕр виççĕмĕш вырăн çĕнсе илнĕ пулсан кăçал – иккĕмĕш. Ачасем маттур. Ăсталăх ÿсет.
Лоцмановсен кубокне çĕнсе илессишĕн иртекен районти ăмăртура виççĕмĕш çул мала тухса çамрăксен команди кубока хăйсенче яланлăхах хăварма пултарчĕ. «Ыран выляма каймалла: команда пухас пулать тенипе нимĕн те пулмасть. Тренировкăсем тăтăш кирлĕ», – питĕ тĕрĕс палăртать çамрăксен тренерĕ, юлташĕ.
Турнирсем ирттерме вара Владимир Витальевич медальсемпе грамотăсене яланах тенĕ пек хăйĕн «кĕсйинчен кăларать». Ачасене хавхалантару кирлине питĕ лайăх ăнланать вăл, шкул ачисем портфолио пухса пынине те. Çулсерен 20–25 пин тенкĕ ачасемшĕн тăкакланин усси пуррине курать вăл. Мăшăрĕ те унăн пуçарăвне ырлать, ăнланать.
«ИП Михайлов» команди – районти ĕçлекенсен спартакиадине хастар хутшăнакансенчен пĕри. Вĕсем ăмăртусене кăмăлтан хутшăнаççĕ, «приказ йĕркипе» мар. Çакă пулать те ĕнтĕ массăллă спорта явăçни.
Юнкăсем юнашар районсене тухса çÿреме те майсем тупаççĕ. «Хамăра кÿршĕсемпе танлаштармалла, унсăрăн спортра «ÿснине» те кураймастăн. Етĕрне районне нумай тухса çÿрерĕмĕр, Воротынецри пăр çине те, – пĕлтерет Владимир Витальевич. – Майсене хамăрăнах шырамалла, спорт валли укçа-тенкĕ питĕ сахал уйăраççĕ-çке». Ку тăрăхри А.Ю. Ильин уйрăм предприниматель те массăллă спорта хăйĕн тÿпине хывать иккен. Апла Юнкă тăрăхĕнче спорт чăн та пурăнать темелле.
Пăрахăçа тухнă «Сăран мечĕк», «Ылтăн шайба» турнирĕсем паян ачасене, пĕр-пĕр ÿсĕмрисене çеç мар, кашни ÿсĕмри ачана кирлине калать предприниматель. Çавăнпа та ачасене спорта чăннипех явăçма сĕнет Владимир Витальевич. Пĕрре мечĕк тапнипе е шайба çапса янипе сывлăх та, вăй та пулмасть. Ун тавра пухăннă çамрăксене те çавнах калать вăл. Хăй сывă пурнăç йĕрки тытнипе, çамрăксене куллен хавхалантарнипе вара вăл – тĕслĕх те, юлташ та.
Н. Николаева.