13 августа 2011 г.
Тимлĕх уйăрмалли ыйтусем пур-ха
Уй-хирти пур ĕçе вăхăтра хатĕрленсе çитес, хăй вăхăтĕнче тата пахалăхлă туса ирттерес, пушар хăрушсăрлăхне тивĕçтерес, ял хуçалăх техникипе инкек-синкексĕр усă курас тата туса илнĕ ял хуçалăх культурисене сыхласа хăварас тĕллевпе район администрацийĕн пуçлăхĕн 2011 çулхи августăн 4-мĕшĕнчи 368 " хушăвĕпе районта ятарлă штаб йĕркеленĕ. Ăна район администрацийĕн пуçлăхĕ Ю.А. Иванов ертсе пырать.
Августăн 10-мĕшĕнче асăннă штабăн пĕрремĕш ларăвĕ иртрĕ. Ăна штаб ертÿçин çумĕ, район администрацийĕн пуçлăхĕн пĕрремĕш çумĕ, ял хуçалăх пайĕн пуçлăхĕ В.А. Калинин ертсе пычĕ.
Район администрацийĕн пĕрлешÿллĕ хуçалăхсем тăрăх çирĕплетсе тухнă ответлă ĕçченĕсем вырăнсенчи лару-тăрупа паллаштарчĕç, лайăххипе пĕрлех ĕçри чăрмавсемпе çитменлĕхсем çинче те чарăнса тăчĕç.
Лару итогĕсене пĕтĕмлетнĕ май Владимир Аркадьевич çавна палăртрĕ. Вырма ирттернипе пĕрлех хуçалăхсенче выльăх апачĕ хатĕрлес ĕçсем те чарăнса лармалла мар. Уйрăмах сĕтеклĕ апат – силоспа сенаж – хатĕрлесси çине пысăк тимлĕх уйăрмалла. Вĕсене хатĕрлемелли вăхăт иртсе пырать.
Çитес çулхи тухăç пирки те паян шухăшлас пулать. Хăш-пĕр хуçалăхсенче кĕр аки ирттерме çĕр хатĕрлесси «уксахлать». Кĕр аки ирттермелли оптималлă вăхăт вара августăн 20-мĕшĕнчен тытăнса сентябрĕн 15-мĕшĕччен.
Техникăна йĕркеллĕ ĕçлеттерессипе вĕсене çунтармалли тата сĕрмелли материалсемпе епле тивĕçтерни те пысăк пĕлтерĕшлĕ. Ку ыйтăва та куç ытамĕнчен вĕçертмелле мар.
Кунсăр пуçне тата пушар хăрушсăрлăхĕ çинчен те манма юрамасть, техникăпа усă курнă чухне ĕçре инкек-синкек ан пултăр.
В. ШАПОШНИКОВ.