13 августа 2011 г.
Кĕрхи ĕçсемпе паллашнă
Августăн 8-мĕшĕнче пирĕн районта ЧР Министрсен Кабинечĕн председателĕн çумĕ, ял хуçалăх министрĕ С.В. Павлов пулнă. Район администрацийĕн пуçлăхĕпе Ю.А. Ивановпа вĕсем Суворов яч. хис., Чапаев яч. хис., Е. Андреев яч. хис., «Свобода» хуçалăхсенче, «Моргаушская» чăх-чĕп фабрикинче пулса курнă. Сергей Владимирович вырма ĕçĕсем, выльăх апачĕ хатĕрлесси, кĕрхи культурăсем акасси мĕнле пынипе интересленнĕ.
Суворов яч. хис. хуçалăхра кĕрхи культурăсен хирне çитсе курнă. Кунта вырма ĕçĕсем анлă сарăлнă. Кĕрхи тулăна вырса пĕтернĕпе пĕрех. 307 гектартан 297 гектар çинче ĕç-пуçа вĕçленĕ ĕнтĕ. Тухăç гектар пуçне вăтамран 31 центнерпа танлашать. С.В. Павлов районти комбайнерсен ăмăртăвĕнче малта пыракан Р.В. Кузнецова хăйĕн юратнă профессине – çĕр ĕçне парăннăшăн тав тунă, малашне те ăнăçусем суннă.
Пысăк хăна йĕтем çинче те пулнă. Кунта ĕçлекенсем ĕçшĕн тÿлессипе те, ăна вăхăтра панипе те кăмăллă пулнине палăртнă.
Чапаев яч. хис. хуçалăхра Сергей Владимирович вырма ĕçĕсемпе пĕрлех кукуруза çитĕнтерессипе те интересленнĕ. Сăмах май кукурузăна кăçал 4 хуçалăхра – Ильич яч. хис., Чапаев яч. хис., «Ударник» хуçалăхсенче тата «Путь Ильича» агрофирмăра ÿстереççĕ.
«Моргаушская» чăх-чĕп фабрикинче пулнă май С.В. Павлов тырă типĕтекен бригада ĕçченĕсемпе калаçнă. Каласа хăвармалла, кунта кăçал вырма ĕçĕсене районта чи малтан пуçăннă.
Е. Андреев яч. хис. хуçалăхра улăма хыççăнах пуçтарса тирпейлесе пыни килĕшнĕ. Тыр-пул тухăçĕ та хуçалăхра пĕчĕк мар, гектар пуçне вăтамран 30,4 центнер тивет.
«Свобода» хуçалăхра вырма ĕçĕсем епле пынине, кĕрхи культурăсем акассине пăхнă. Хуçалăхра çурхи тĕш тырă культурисене те пухса кĕртме тытăннă ĕнтĕ.
«Халĕ çанталăкĕ те çĕр ĕçченĕсемшĕн питĕ меллĕ. Çавăнпа та кашни минучĕ хаклă. Вырмара васкаварлă пулни пысăк пĕлтерĕшлĕ»,– палăртнă Сергей Владимирович.
Хамăр инф.