06 августа 2011 г.
Пыл уявне чĕнетпĕр
Куславккасем çуллен купăста уявне, Элĕксем çĕр улми уявне ирттереççĕ. Муркашсем пĕлтĕр пуçласа «Вĕлле хурчĕ – ылтăн хурт» ятпа пыл уявне йĕркелерĕç.
Пыл уявне пирĕн тăрăхра палăртни ăнсăртран мар. Пирĕн ентеш Н.В. Никольский профессор та вĕлле хурчĕсене чылай тытнă, пылран тĕрлĕ эмел хатĕрлеме пĕлнĕ. Муркаш тăрăхĕнче хурт-хăмăр ăстисем те нумай. Çуллен вĕсен йышĕ ÿсет. Çак тутлă çимĕçе юратман çын пур-ши тата?!
Пыл уявĕ иртнĕ çул нумайăшне килĕшнĕрен ăна районта кăçал та ирттерме палăртнă. Район админстрацийĕн пуçлăхĕн августăн 4-мĕшĕнчи 795 " йышăнăвĕпе ятарлă комиссии йĕркеленĕ, ĕç планĕ çирĕплетнĕ.
Уяв кăçал августăн 12-мĕшĕнче Муркашра «Сывлăх» ФСК умĕнче иртет. Хыççăнхи вырсарни кун (августăн 14-мĕшĕнче) Пыл спасĕ пулнăран уява çак кун палăртни вырăнлă та.
Уяв 10 сехетре чăваш йăлипе пыла чысланинчен пуçланать. Хыççăн уява официаллă йĕркепе уçаççĕ. Унăн программи пуян та тĕрлĕ енлĕ. (Çавăнпа кашнинех уява килсе курма чĕнетпĕр те.)
Кашни ял тăрăхĕ уява паллă хурт-хăмăр ăстисемпе тухать. Кунта пыл çеç мар, унран хатĕрленĕ тĕрлĕ çимĕç, эмел, сиплĕ курăксем сутаççĕ. Пыл сăрине тутанма кам хирĕç пултăр-ха тата;! Хурт пăхакансем валли ĕçре кирлĕ хатĕрсем, им-çамсем пулаççĕ.
Хурт-хăмăр ĕçне аталантарассипе сĕтел хушшине ларса та канашлаççĕ.
«Çулталăкри чи лайăх хурт-хăмăр ăсти» конкурс итогĕсене пĕтĕмлетеççĕ. Сăн ÿкерчĕксен выставкине те кăмăл пуррисене хутшăнма ыйтаççĕ.
Ача-пăчана уявра уйрăмах хытă кĕтеççĕ. Пĕчĕккисене валли ятарлă кафе ĕçлет. Вĕсене валлиех тĕрлĕ вăйă-конкурс йĕркелеççĕ.
Уявра кунĕпех юрă-кĕвĕ янăрĕ.
Пыл вăл тутлă çимĕç кăна мар, витаминсен çăлкуçĕ те, сиплĕ эмел те, лайăх кăмăл та, çирĕп сывлăх та. Апла пурте уява васкар. Пыл тутанма, пыл туянма! Тен хăшĕ-пĕри ăстасен опычĕпе паллашнă хыççăн хăй те хурт-хăмăр ĕçне тытăнĕ.
Уявра тĕл пуличчен!
А. Иванов.