06 августа 2011 г.
«Тепĕр çичĕ шкул хатĕр мар»
Маларах пĕлтернĕ пек июлĕн 26–29-мĕшĕсенче районта йĕркеленĕ ятарлă комисси шкулсем çĕнĕ вĕренÿ çулне мĕнле хатĕрленнине вырăна тухса тишкерчĕ. Пур шкул та ачасене йышăнма хатĕр-и; Юсав ĕçĕсем пуринче те вĕçленнĕ-и; Çак ыйтусене район администрацийĕн вĕрентÿ, çамрăксен политики тата физкультурăпа спорт пайĕн пуçлăхне З.Ю. ДИПЛОМАТОВĂНА хуравлама ыйтрăмăр:
– Районта 29 шкул. Августăн 4-мĕшĕ тĕлне патшалăх пушар надзорĕ 27 шкула, Роспотребнадзор 22 шкула йышăнчĕ. Çапла вара тепĕр çичĕ шкул çĕнĕ вĕренÿ çулне хальлĕхе хатĕр мар темелле.
Мăн Сĕнтĕрти вăтам шкула йышăнманни унта халĕ хутса ăшăтмалли системăна çуса тасатас ĕç вĕçленменнипе çыхăннă.
Атапайри тĕп шкулта шкулчченхи ушкăн ĕçлет. Комисси тĕрĕслевĕ вăхăтĕнче çав ушкăн валли урамра веранда туса пĕтерменччĕ. Профнастил илсе килнĕ. Ĕç тепĕр эрнене юлмасть.
Москакассинчи вăтам шкула столовăйĕнче тата хими кабинетĕнче çитменлĕхсем пуртан йышăнман.
Анаткассинчи пуçламăш шкула та столовăй тĕлĕшĕнчи, çутăпа тивĕçтерессинчи çитменлĕхсене пула тата медицина пÿлĕмĕнче ятарлă йĕркепе палăртнă чухлĕ оборудовани çуккипе йышăнман.
Чуманкассинчи тата Турайри вăтам шкулсенче юсав ĕçĕсем вĕçленмен. Вĕсем вырнаçнă ял тăрăхĕсем «Ял тăрăхĕнчи комплекслă компактлă застройка тата тирпей-илем» конкурсра çĕнтернĕ. Çавна май хальхи вăхăтра шкулсенче пĕтĕмпе 5 миллион та 740 пин тенкĕлĕх тума палăртнă юсав ĕçĕсем пыраççĕ. Çак суммăн çурине республика бюджечĕ саплаштарать, тепĕр çуррине – вырăнти бюджетран уйăрнă.
Чуманкассинчи вăтам шкулта шыв пăрăхĕсене, канализаци тытăмне юсаççĕ, чÿрече блокĕсене пластик блоклă чÿречесемпе ылмаштараççĕ, çĕнĕ алăксем лартаççĕ, хăма урай та çĕнелмелле. Турайри вăтам шкулта та чÿрече блокĕсене пластик блоксемпе ылмаштараççĕ, шкул çурчĕ тавра отмостсене çĕнетеççĕ, çивитти юсаççĕ тата класс пÿлĕмĕсенче линолеум улăштараççĕ. Ĕçсене пурнăçлакансемпе шкулсем килĕшÿ тунă тăрăх юсав ĕçĕсем августăн 12-мĕшĕ тĕлне вĕçленмелле.
Кашмашри пуçламăш шкул та йышăнманнисен шутĕнче. Шкул тăватă йывăç çуртран тăрать. Вĕсене иртнĕ ĕмĕрĕн 31-мĕш, 57-мĕш, 70-мĕш тата 71-мĕш çулĕсенче тунă. Çуртсем питĕ кивĕ. Çирĕплетнĕ йĕрке тăрăх вара йывăç çуртсене эксплуатацилеме юрамасть. Роспотребнадзор Кашмашри шкул столовăйĕ санитарипе гигиена требованийĕсене тивĕçтерменнине палăртрĕ. Паянхи куна çĕнĕ шкулăн эскиз проектне çеç туса хатĕрленĕ. Ытти документсене хатĕрлес тапхăр пырать. 2014 çулта кунта çĕнĕ шкул тума палăртнă.
Çĕнĕ вĕренÿ çулне хатĕрленсе çитмен шкулсенче паян çитменлĕхсене пĕтерессипе тăрăшаççĕ. Республикăри Вĕренÿ тата çамрăксен политикин министерствин хушăвĕпе килĕшÿ-ллĕн августăн 15-мĕшĕ тĕлне пур шкул та вĕренÿ çулне хатĕр пулмалла.
Н. Николаева.