03 августа 2011 г.
«Мечта» – асамлă тĕнче
Çуллахи кунсем – ачасемшĕн чи лайăх та ырă вăхăт. Хĕвелĕ пăхать, таврана чечек шăрши сарăлать, çемçе курăк çинче çара уран чупма аван... Çулла урамра вылякан вăйăсем ачасемшĕн татах та интереслĕрех туйăнаççĕ.
Çуллахи кунсем ачасемшĕн асăнмалăх пултăр тесе Мăн Сĕнтĕрти «Мечта» ача садĕнче ĕçлекенсем питĕ нумай тăрăшрĕç.
Ача сачĕн картишне кĕрсенех хăвна асамлă тĕнчене лекнĕн туятăн. Кунта чечек питĕ нумай – чĕррисем те, чĕрĕ маррисем те. Тепĕр тесен чĕрĕ маррисем интреслĕрех те. Вĕсене кунти ĕçченсем напиток кĕленчисенчен ăсталанă: тюльпансем, салтак тÿми, нарциссем...
Кунтах Яга кинемейĕн çурчĕ те. Çурт умĕнче ачасем чылайччен выляма юратаççĕ. Ывăнсан вара илемлĕ саксем тата капăрлатнă пĕренесем çине ларса канаççĕ.
Малалла утса пынă май пĕчĕк кÿлĕ умĕнче ларакан акăшсене курма пулать. Автомашина кустăрмисенчен хатĕрленĕскерсем хăйсене чăн-чăн кÿлĕ умĕнче туяççĕ: питĕ мăнаçлă вĕсем. Ача сачĕн картишне вăрман хуралçисем сыхлаççĕ. Хурăн вуллинчен ăсталанăскесем никамран та хăрамаççĕ.
Садик тепĕр енче вара – зоопарк. Тигр, жираф тата зебра пурăнаççĕ кунта. Инçетрех мар сысна çемйине те курма пулать. Ачасем вĕсене чĕрĕ чунсене ачашланă пекех ачашлаççĕ.
Тĕлĕнмелле çынсем ĕçлеççĕ садикре. Пушă вăхăта нихăçан та сая ямаççĕ, мĕн те пулин ăсталаççĕ, çĕнĕ япаласем шухăшласа кăлараççĕ. Ача сачĕн ертÿçи Галина Александровна Шолкова та коллектива хавхалантарсах пырать.
Килсе курăр пирĕн пата!
Л. Алатова,
воспитатель.