03 августа 2011 г.
Лару-тăру шухăшлаттарать
Иртнĕ çул республикăра августăн 1–31-мĕшĕсенче «Трактор» уйăхлăх операци иртнĕччĕ. Ун чухне пĕтĕмпе 3196 трактора, çул-йĕр тата строительство, ытти йышши хăй тĕллĕн çÿрекен машинăсене тĕрĕслеме май килнĕ. Лару-тăру йĕркеллĕ темелле мар. Тĕрĕсленĕ пĕтĕм техника хатĕрĕнчен регистраци правилисене пăхăнмасăр усă кураканнисем 49 пулнă, патшалăх техосмотрĕ витĕр тухманнисем – 119, 80 машинист трактористăн удостоверени, 184 машинăн регистраци докуменчĕ, 75-шĕн патшалăх регистраци знакĕ пулман, 178 техника хатĕрĕпе çул-йĕр хăрушсăрлăх требованийĕсене пăсса усă курнă.
Тупса палăртнă йĕркесĕрлĕхсем тĕлĕшпе республикăри предприятисемпе организацисен ертÿçисене 13 предписани, пĕтĕмпе 150450 тенкĕлĕх 493 административлă штраф панă, 77 техника хатĕрне ĕçлеттерме чарса патшалăх регистраци знакне вистесе илнĕ.
Çапла вара иртнĕ çул ирттернĕ «Трактор» уйăхлăх операци хăй тĕллĕн çÿрекен машинăсен хуçисемпе патшалăх регистрацийĕн, техосмотр тăратассин, çул-йĕр хăрушсăрлăхĕн правилисене пăхăнассин ыйтăвĕсемпе çине тăрса ĕçлеме хистенĕ.
Çавна май Чăваш Республикинчи хăй тĕллĕн çÿрекен машинăсемпе ытти йышши техника хатĕрĕсен техника шайне тĕрĕслесе тăракан патшалăх инспекцийĕпе республика Шалти ĕçсен министерствин патшалăх çул-йĕр хăрушсăрлăх инспекцийĕ кăçал та августăн 1–31-мĕшĕсенче «Трактор» уйăхлăх операци ирттересси пирки хушу кăларнă. Уйăхлăх операци вăхăтĕнче çÿлте асăннă ыйтусемпе пĕрлех техника хатĕрĕсене техосмотр тăратнипе транспорт налукне тÿлнине те, кивелсе çитнĕ техника хатĕрĕсене регистраци учетĕнчен кăларса утилизацилессине те пысăк тимлĕх уйăрĕç.
Гостехнадзорăн хуласемпе районсенчи патшалăх аслă инспекторĕсене уйăхлăх операци итогĕсем пирки сентябрĕн 10-мĕшĕччен отчетсем тăратма хушнă.