30 июля 2011 г.
Районти шкулсенче çĕнĕ вĕренÿ çулне хатĕрленес тапхăр вĕçленсе пырать. Ятарлă комисси шкулсенче туса ирттернĕ ĕçсемпе паллашать, вĕсем ачасене кĕтсе илме хатĕр е хатĕр маррине пăхса тухать. Ĕнерхи кун тĕлне комисси 12 шкула йышăннă, вĕсем çĕнĕ вĕренÿ çулне хатĕр. Комисси тĕрĕслевĕ малалла пырать.
Чуманкассинчи вăтам шкулта (маларах пĕлтернĕччĕ ĕнтĕ унта юсав ĕçĕсем пысăк калăпăшлă пулнине) ĕçсем вĕçленмен-ха.
– Пирĕн патра «Мера» чикĕллĕ яваплăхлă пĕрлешÿ юсав ĕçĕсем пурнăçлать. Уйăрса панă 3 миллион ытла укçа-тенкĕне пĕтĕмпех шкула юсаса çĕнетес ĕçе хыватпăр. Районти типлă шкулсенчен чи малтан хута янă шкулта вара ĕçĕ чылай. Алăксене пĕтĕмпех улăштаратпăр, иккĕмĕш хутри класс пÿлĕмĕсенче чÿречесем улăштарнă ĕнтĕ, халĕ пĕрремĕш хутра та çакăн пек ĕç пурнăçламалла. Кунсăр пуçне спортзалта душ пÿлĕмĕсем тумалла, тротуар çĕнетсе сармалли те пур. Пĕр сăмахпа каласан ĕçĕ чылай, – пĕлтерет шкул директорĕ Валерий Михайлович Васильев.
Шкултан кăçал 18 çамрăк вĕренсе тухнă. Çĕнĕ вĕренÿ çулне пĕрремĕш класа шăп çавăн чухлĕ ача килмелли паллă. Апла йыш чакмасть. Иртнĕ вĕренÿ çулĕнче кунта 221 ача вĕреннĕ. Ку тăрăхра ачасем çуралассине тишкернĕ тăрăх çитес çулсенче шкулта 200 ачаран чакмалла мар.
Шкулта ĕçсем мĕнлерех пынипе кĕçнерни кун Чăваш Республикин Министрсен Кабинечĕн председателĕ О. Макаров, вĕренÿпе çамрăксен политикин министрĕ В. Иванов, Роспотребнадзорăн республикăри управленийĕн ертÿçи Н. Луговская тата Чăваш Республикинчи пушар надзорĕн патшалăх тĕп инспекторĕ Н. Петров паллашрĕç. Кунсăр пуçне ĕçлĕ ушкăн Калайкассинчи вăтам, Кашмашри тĕп шкулсене тата кирпĕч заводне çитсе курчĕ.
Н. Николаева.