30 июля 2011 г.
Район уй-хирĕсенче вырма ĕçĕсем вăй илсе пыраççĕ. Çак вăхăта «Восток», «Герой», Илич яч. хис., «Свобода», Суворов яч. хис. хуçалăхсем, «Моргаушская» чăх-чĕп фабрики, В.В. Бархаткин хресчен (фермер) хуçалăхĕ хăйсен «хир карапĕсене» кĕрхи тулă пуссисене илсе тухнă. Районĕпе пĕтĕмпе вырма ĕçĕсене 203 гектар çинче ирттернĕ. Малтанлăха палăртнă тăрăх тухăç пĕр гектар пуçне вăтамран 27,5 центнерпа танлашать.
Ильич яч. хис., «Восток» хуçалăхсенче улăма çийĕнчех пухса тирпейлессине йĕркеленĕ.
Вырмапа пĕрлех выльăх апачĕ хатĕрлес ĕçсем те чарăнман. Нумай çул ÿсекен курăксене 94 процент, пĕр çул ÿсекен курăксене 31 процент çулнă, утă 7304 тонна (133 процент), сенаж 4143 тонна (63 процент), силос 15517 тонна (84 процент) янтăланă.