27 июля 2011 г.
Чăн-чăн ăстасемех
Пирĕнтен кашниех расна. Кашнийĕнех хăйĕн интересĕсем, ăнтăлăвĕсем, тавра курăмĕ. Пур чухне те эпир ăна курмастпăр та. Çынпа калаçсан, пĕрле ларса канашласан, унпа çывăхрах туслашсан, унăн шухăш-кăмăлĕпе кăсăклансан вара çав çын пирки унччен пĕлменнине чылай пĕлме пултаратăн.
Сăмахăм вара паян Юнкă ялĕнче пурăнакан Валентина Павловнăпа Лев Петрович Соколовсем пирки.
Валентина Павловна унччен Мăн Сĕнтĕрте пурăннă, чылайранпа медицина сестри пулса ĕçленĕ. Юнкăра пĕччен пурăнакан амăшĕ Елена Степановна Степанова патне 7 çул каялла пурăнма килнĕ. Сăмах май Елена Степановна вăрçă участникĕ пулнă, телеграфист пулса çапăçнă. Шел пулин те кăçал апрель уйăхĕнче вăл пирĕнтен яланлăхах уйрăлса кайнă.
Лев Петрович Сĕнтĕрти юсавпа техника предприятийĕнче тимĕрçĕре тăрăшнă. Сумлă ĕçпе яланах хисепре пулнă.
Халĕ икĕ ватă килти хуçалăхра иккĕшех тăрмашса пурăнаççĕ. Ватă çынсем тесе калаймăн. Хуçалăхра та, картишĕнче те пĕтĕмпех тирпейлĕ те йĕркеллĕ. Йăран çинче çум курăк таврашне кураймăн. Улми-çырли те, пахча çимĕçĕ те пахчара çителĕклĕ.
Анчах та сăмахăм ун пирки мар. Эпир юлашки вăхăтра пластик савăт таврашĕпе тавралăха вараласа пĕтерни пирки нумай калаçатпăр. Вăл çĕрмест, ăна çунтарма юрамасть. Чăннипех те проблема темелле. Лев Петровичпа Валентина Павловна вара пластик кĕленчесене хаваспах пухаççĕ. Мĕн тума тетĕр-и; Акă вĕсем пластик кĕленчесенченех касса çыпăçтарса хăйсен аллипех теплица та ăсталанă. Хăяр, помидор вырăн тупнă унта. Çумăр шывне пухма та усă кураççĕ пластик кĕленчесемпе. Теплицăри çимĕçсене те унпах шăвараççĕ. Шыв валакне те пластик кĕленчесемпе усă курса ăсталанă. Чăннипех те, шухăшласа пăхсан, кăштах фантази пулсан – хуçалăхра тем тума та юрăхлă япала.
– Эпир пластик кĕленчесене пухнă çумăр шывĕпе шăварма кăна мар, хамăр çăвăнма та унпах усă куратпăр. Çемçе вăл,– кăмăллăн калаçать Валентина Павловна.
Уйрăм калаçу – Лев Петрович пирки. Ачаллах вăл ÿкерме юратнă. Çак туртăм унăн ватлăх çулĕсенче те çухалман. Вĕсем патне пÿрте кĕрсен картинăсен галерейине лекнĕнех туятăн. «Баян», «Охота на львов», «Леша Попович», «Девятый вал», «Рожь» тата ытти нумай картина стенасем çинче вырăн тупнă.
Лев Петрович хĕрхенекен хытă çын мар. Картинăсенчен чылайăшне вăл юлташĕсене те парнеленĕ.
Ăстаçă картинăсем ÿкерме сăрă та, рамăсем те хăех хатĕрлет.
– Алли çыпăçать,– пĕлтерет ун пирки мăшăрĕ.
Ăстасемпе сыв пуллашма та вăхăт çитрĕ. Вĕсем вара пахчана васкарĕç. Утă вăхăчĕ вĕт-ха. Çулса пăрахнă курăка тавăрса типĕтмелле, купаламалла.
В. ШАПОШНИКОВ.