27 июля 2011 г.
Юсав ĕçĕсене вăхăтра пурнăçлама май пур
Шкулсем çĕнĕ вĕренÿ çулĕнче ачасене йышăнма хатĕрленеççĕ, ача сачĕсенче юсав ĕçĕсем вĕçленсе пыраççĕ. Çак лару-тăрупа район администрацийĕн вĕрентÿ, çамрăксен политики тата физкультурăпа спорт пайĕн ертÿçине З.Ю. Дипломатовăна паллаштарма ыйтрăмăр.
– Шкулсемпе ача сачĕсенче çĕнĕ вĕренÿ çулне хатĕрленес тапхăр вĕçленсе пырать. Пĕтĕмĕшле ÿкерчĕк мĕнлерех?
– Пĕтĕмĕшле каласан вĕрентÿ учрежденийĕсем çĕнĕ вĕренÿ çулне хатĕрленессипе тĕрлĕ енлĕ ĕçсем пурнăçларĕç: вак-тĕвекрен пуçласа пысăк мероприятисем таранах. Халĕ шăпах çак ĕçсене пĕтĕмлетсе хак парас вăхăт.
Район администрацийĕн пуçлăхĕн ятарлă хушăвĕпе вĕрентÿ учрежденийĕсем çĕнĕ 2011–2012 вĕренÿ çулне хатĕррине йышăнма комисси йĕркеленĕ. Ун йышĕнче район администрацийĕн вĕрентÿ пайĕн, патшалăх пушар надзорĕн представителĕсем, Роспотребнадзорпа Ростехнадзор специалисчĕсем, шалти ĕçсен пайĕн тата ФСБ сотрудникĕсем, ГОпа ЧС представителĕсем пур.
Комисси вĕрентÿ учрежденийĕсене йышăнма çирĕплетнĕ график тăрăх тухса çÿрет. Акă ĕнер специалистсем Атапай, Оринин, Москакасси, Юнкă, Нискасси, Мăн Сĕнтĕр, Мăн Хураçка, Ильинка шкулĕсенче, Вăрманкассинчи пуçламăш шкул-ача садĕнче, «Золушка», «Колокольчик», «Рябинушка», «Улыбка», «Мечта», «Тюльпан» ача сачĕсенче пулчĕç. Унти ĕçсемпе тĕплĕн паллашрĕç.
Тĕрĕслевсем хыççăн кашни кунах ЧР Вĕрентÿ тата çамрăксен политикин министерствине миçе вĕрентÿ учрежденийĕ çĕнĕ вĕренÿ çулне хатĕррине пĕлтеретпĕр.
– Юсав ĕçĕсене вăхăтра туса ирттерме майсем пур-и?
– Ку çул депутатсен районти Пухăвĕ йышăннипе вĕрентÿ учрежденийĕсен çурчĕсенче юсав ĕçĕсем ирттерме (ытларах çивиттисем юсаса çĕнетме) тата хутса ăшăтас тапхăра хатĕрленмелли ĕçсене пурнăçлама хушма укçа-тенкĕ уйăрса пачĕç – 2 миллион та 600 пин тенкĕ ытларах.
«Колокольчик», «Мечта», «Радуга» ача сачĕсенче çивиттисем юсамалла, «Путенере» чÿрече блокĕсене улăштармалла тата коммуникаци тытăмĕн юсав ĕçĕсене пурнăçламалла.
Мăн Сĕнтĕрти вăтам шкулта тата «Золушка» ача садĕнче хутса ăшăтас тапхăра хатĕрленнĕ май хĕллехи вăхăтра ăшă паракан пăрăхсене шалтан çуса тасатмалла. Иртнĕ хĕл çак вĕрентÿ учрежденийĕсенче температура режимĕ санитари правилисене тивĕçтерменни те пулнăччĕ. Хутса ăшăтас тапхăра хатĕрленессипе ытти хăш-пĕр вĕрентÿ учрежденийĕсенче те ĕçсем пыраççĕ.
Калайкассинчи вăтам шкулта шыв башнине юсанă, çивитти çинче юсав ĕçĕсем пурнăçламалла.
Чуманкассинчи тата Турайри вăтам шкулсенче юсав ĕçĕсем активлă тапхăрта. Асăннă шкулсем вырнаçнă ял тăрăхĕсем «Комплекслă компактлă застройка» конкурсра çĕнтернĕ. Çавна май хальхи вăхăтра шкулсенче чÿрече блокĕсене пластик чÿречесемпе улăштарас, алăксем çĕнетес, коммуникаци сечĕсене юсас тата ытти ĕçсем пыраççĕ.
– Ача сачĕсенче черетсем пурри те хăй пирки мантармасть.
– Черет «Путене», «Солнышко», «Мечта» тата «Колокольчик» ача сачĕсенче пур. Ку çул «Колокольчикра» (Москакасси) пушă пÿлĕм юсаса 25 ачаран тăракан ушкăн валли пÿлĕм хатĕрлеççĕ. Çапла вара йывăрлăха малтанлăха та пулин сирме май пулать.
Малаллахи çулсем пирки калас пулсан районти хăш-пĕр ача сачĕсене реконструкцилеме палăртнине тата çĕнĕ ача сачĕ тăвассине республикăри ятарлă программăна кĕртме май тупрăмăр. 2012 çулта Муркашра 60 ача вырнаçмалăх çурта реконструкцилесе ача сачĕ тумалла. 2013 çулта Мăн Сĕнтĕрти ача садĕнче пристрой хăпартса хута ямалла. Унта 100 ача валли вырăн пулмалла. 2014 çулта Москакассинчи ача садĕнче 40 ача вырнаçмалăх пристрой туса хута кĕртмелле. Çав çулах Муркашра çĕнĕ ача сачĕ тума палăртса хунă. Вăл 200 пепке йышăнмалла.
Çак пысăк ĕçсем тĕрлĕ бюджет шучĕпе пулаççĕ. Вырăнти бюджетран кирлĕ укçа-тенкĕн 20 процентне уйăрса параççĕ, ыттине – республика бюджетĕнчен.
Н. Николаева
калаçнă.