01 июня 2011 г.
Уй-хир ĕçĕсем çуллана куçаççĕ
Пĕрлешÿллĕ хуçалăхсенчен район администрацийĕн ял хуçалăх пайне тăратнă оперативлă кăтартусемпе çу уйăхĕн 31-мĕшĕ тĕлне Муркаш енче тĕш тырăпа пăрçа йышши культурăсем акас ĕç вĕçленнĕ. Хуçалăхсем çерем çĕрсене пусă çаврăнăшне кĕртнипе пĕтĕмпе 9005 гектар (104 процент) акса хăварнă.
Паян хуçалăхсем çĕр улми лартас ĕçре тимлеççĕ. Çурхи уй-хир ĕçĕсен планĕпе пăхнă 1253 гектартан 1020 гектарне лартнă та ĕнтĕ.
Çурхи кунсем хыçа юлса пынă май çĕр ĕçченĕ умне акнă-лартнă культурăсене тĕрĕс-тĕкел пăхса ÿстересси тухать. Ĕнерхи кун тĕлне районти çĕр ĕçченĕсем 790 гектар çинчи тырă-пулăна çум курăкĕнчен, 274 гектар çинче чир-чĕртен хÿтĕлесе химилле ĕçсем туса ирттернĕ.