06 июля 2011 г.
Пуçарулăхпа хастарлăх ытларах кирлĕ
«Пĕр-пĕр ĕçе май килнĕ таран лайăхрах пурнăçлас тесе шутлатăн, анчах яланхи пекех пулса тухать». Çакăн евĕр каларăша илтмен çын çук та пулĕ. Кĕçнерни кун, июнĕн 30-мĕшĕнче, районти çамрăксен форумĕ иртнĕ пирки те сăмаха çапла пуçлас килет. Çамрăксене питĕ кирлĕ мероприяти пулчĕ: конкретлă, ĕçлĕ тата уçă калаçусем, çамрăксемшĕн питĕ вырăнлă сĕнÿсем, тематикăна тĕрĕс палăртса йĕркеленĕ интереслĕ программа.
Программа тенĕрен. Район администрацийĕ çамрăксене тĕрлĕ сферăри тĕрлĕ енлĕ мероприятисене явăçтарма нумай ĕç пурнăçлать. Анчах та çамрăксем енчен пуçарулăх, хастарлăх сахалрах çав. Акă Лантăш вăрманĕн уçланкине 60–70 çамрăк кăна пухăнни те форум анлăшне самаях хĕсрĕ: унти опыт районăн кашни кĕтесĕнчи çамрăк патне (пурĕ 177 ял пулнине шута илсен пушшех те!) хальлĕхе çитмерĕ.
Муркаш, Оринин, Юнкă, Ярославка, Чуманкасси, Уйкас Янасал, Ильинка, Катькас, Йÿçкасси ял тăрăхĕсем – çакăнта пурăнаççĕ иккен районти чи хастар, малашлăхра ура çине çирĕп тăрас тĕллевлĕ çамрăксем. Мероприятие районти вунă ытла ĕç коллективĕнчи çамрăксем хутшăнчĕç. Вĕсем ятарлă вăйă хыççăн пĕр-пĕринпе часах пĕр чĕлхе тупрĕç.
Тăрăшуллă çамрăксене ĕçри çитĕнÿсемшĕн район администрацийĕн Хисеп грамотипе тата Тав çырăвĕпе чысларĕç. Нумаях пулмасть республикăри «МолГород» вĕренÿ форумне хутшăннисене тĕп хуларан килнĕ хăнасем ятарлă сертификатсем пачĕç. Республика форумĕн ĕçне унта хутшăннă хастар çамрăксем района çитерчĕç те: унти интереслĕ те вĕрентÿллĕ самантсемпе Муркашра усă курчĕç.
«Çамрăксем – политикăра» блок ĕçĕ уçă калаçу евĕр иртрĕ. Яш-кĕрĕмĕн ыйту чылай: ĕç тупма та, тепĕр чухне практикăна вырнаçма та йывăр. Общество эрех ăшне «путма» пуçлани те пăшăрхантарать. Калаçура районти ытти çивĕч ыйтусене хускатса нумай канашларĕç. Унта ЧР Президент администрацийĕн патшалăх влаç органĕсемпе тата обществăлла пĕрлешÿсемпе ĕçлекен пай пуçлăхĕ Д. Щепелев, район администрацийĕн пуçлăхĕ Ю. Иванов, унăн çумĕ Л. Тарасова, республикăри «Çамрăксен технологийĕсем» обществăлла пĕрлешĕвĕн ертÿçи А. Ефимов, депутатсен районти Пухăвĕн депутачĕсем В. Вязов, Н. Ванеркин тата П. Бирюков хутшăнчĕç. Вĕсем панă сĕнÿ-канашсене пĕтĕмлетсе çакна калама пулать. Çамрăксен политикăра, унта кăна мар, кирек епле сферăра та палăрас тесен малтанах лайăх ĕçлеме пултарнине кăтартса памалла. Çакна шăпах ĕçсемпе çирĕплетмелле те. Апла пулсан ыттисемшĕн тĕслĕх пулса тăмалла, активлă пулмалла.
Мĕнрен пуçламалла; Тата бизнеспа çыхăннă çакăн евĕр ытти ыйту çине хурав илес текенсем «Старт-ап» блок тавра пухăнчĕç. Унта Мăн Сĕнтĕрти А. Петров уйрăм предприниматель, районти бизнес-инкубатор ертÿçи Е. Субботин тата район администрацийĕн экономика пайĕн специалисчĕ В. Пушкова пуçарас ĕçре малтанхи утăмсене тунă чух мĕн çине тимлĕх уйăрмаллине вĕрентрĕç. Ку блокра çамрăксем собриологи наукипе (урăлăх çинчен вĕрентет) те паллашрĕç. Пĕр минут та усăсăр иртмерĕ форумра.
Интереслĕ программăна татах та интереслĕрех тума тĕрлĕ вăйăсем пулăшрĕç: пейнтбол, геокешинг, спорт ташшисем, волейбол. Пейнтбол вăййине çамрăксене Н.Г. Ванеркин парнелерĕ темелле: укçа-тенкĕ тăкаклама тивмерĕ яш-кĕрĕмĕн.
Форум çинчен сăмаха вĕçленĕ май район администрацийĕн пуçлăхĕ Ю.А. Иванов çамрăксем умĕнче каланине илсе кăтартас килет. «Çĕр çине килнĕ кирек хăш ăрăвăн та Çĕр çинчи лару-тăрăва ăна йышăннă вăхăтринчен лайăхрах туса хăварма тăрăшмалла», – терĕ Юрий Александрович. Апла пулсан ĕç кашнин валлиех çителĕклĕ.
Н. Николаева.