23 июня 2011 г.
Чăваш Ен хăнасене хапăл туса йышăнать
Чăваш Ен Республика кунне питĕ тĕплĕн хатĕрленчĕ, анлă программăпа уявлама палăртрĕ. Çавна май тĕп хуламăрта июнĕн 23, 24-мĕшĕсенче «Раççей çăл куçĕсем» фестиваль иртмелле. Унта хутшăнма Раççейĕн 26 регионĕнчен пултарулăх ушкăнĕсем килсе çитрĕç. Ярославль, Оренбург, Коми, Карели тата ытти чылай тăрăхри халăх пултарулăхĕн 30 ушкăнĕ савăнтарĕ пире çак кунсенче.
Июнĕн 21-мĕшĕнче Шупашкара пĕрремĕш хут Иран делегацийĕ çитрĕ. 23-мĕшĕнче вара Наци музейĕнче 16.00 сехетре ал ĕç ăстисен куравĕ уçăлĕ, вĕсен пултарулăхĕпе паллашма май пулĕ.
Июнĕн 23-мĕшĕнче 17.00 сехетре фестивале хутшăнакан ушкăнсем тĕп хула урамĕсем тăрăх утса иртĕç. Илемлĕ тумсемлĕ юрă-ташă ăстисем хăйсен пултарулăхĕпе паллаштарса Наци библиотекинчен пуçласа Хĕрлĕ тÿреме çитĕç. 19 сехетре фестиваль уçăлĕ. Хĕрлĕ тÿремре иртекен уяв уçăлнине тÿрĕ трансляцие УАО «Ростелекомăн» «ВТК-Информ» кабель сетĕнче тÿрĕ эфира кăларĕç. Чăваш наци радиовĕ те çапла майпах ĕçлĕ.
Июнĕн 24-мĕшĕнче вара Шупашкар хули чăн-чăн уяв лапамĕ пулса тăрĕ. Тĕрлĕ кĕтесре хăйне уйрăм уяв иртĕ.
Фестивалĕн яланхи хăнисем – Чăваш Республикинчи районсенчи пултарулăх ушкăнĕсем. Вĕсен пултарулăхĕпе Лакрей вăрманĕнче, «Шупашкар» суту-илÿ çурчĕ умĕнче, «Салют» Культура керменĕ çывăхĕнче паллашма пулать.
Июнĕн 23, 24-мĕшĕсенче декораципе хушма искусствăн «Руç ăстисем» традициллĕ конкурсĕ тĕрлĕ номинаципе иртĕ. Унта Пушкăрт, Бурят, Иран тата ытти чылай тăрăхри ăстасем хутшăнĕç. Çакăн пек тулли программăпа ирттерме палăртнă уяв тапхăрне. Пурне те хапăл туса йышăнать тĕп хуламăр.
Р.Илларионова.