22 июня 2011 г.
Килсе курăр, ÿкĕнмĕр
Районти историпе краеведени музейĕ тĕрлĕ экспонатсемпе пуян. Кунта килсен кашниех хăйне кăсăклине пĕлме пултарать. Паллă кунсене, уявсене халалланă тĕрлĕ курав ĕçлет. Акă халĕ те республика кунĕ çитнĕ май Николай Григорьевич Юткин ÿнерçĕ ĕçĕсемпе «Родные просторы» курав уçăлчĕ. Паллă ăста Чуманкасси ял тăрăхĕнчи Анаткас Апаш ялĕнче пурăнать. Вăл чылай çĕрте пулса курнă, çакна унăн ĕçĕсем те çирĕплетеççĕ. Николай Григорьевич хăй пурăнакан тăван ял сăн-сăпатне ытарлăн эрешленĕ.
Çавăн пекех кунта уçăлнă «Тĕнче тавра» фотокурав та паллă вырăн йышăнать. Ăна Владивостокри В.Тузлуков тата Новосибирскри Б.Казначеев экспедицинче пулнă материалсем тăрăх хатĕрленĕ. Ĕçлĕ çул çÿрев вара тăхăр çĕр-шывра иртнĕ. Унти пулăмсене сăнланă та ĕнтĕ кураври сăн ÿкерчĕксем. Курава наука, культура тата искусство регионсем хушшинчи «София» обществăлла организаци витĕмĕпе йĕркеленĕ. Музей ĕçченĕсем сире пурне те хапăл туса кĕтеççĕ.
Р. Илларионова.