30 апреля 2011 г.
Муркашсем акватлона парăнтарнă
Çĕнĕ Шупашкар хулин акватлон енĕпе (ишесси тата чупасси) иртнĕ уçă ăмăртăвне Муркашсем те хутшăнчĕç. Районти ачасемпе çамрăксен спорт шкулĕнче вăй хуракан В. Герасимов тренерăн воспитанникĕсем унта тивĕçлĕ хутшăнса лайăх кăтартусемпе таврăнчĕç.
1999 çулта çуралнă тата кĕçĕнреххисен ÿсĕмĕнче ăмăртнă Ирина Григорьева 2-мĕш вырăн çĕнсе илнĕ, Ксения Никонова çиччĕмĕш пулнă. Аслăраххисен ÿсĕмĕнче Екатерина Мясникова палăрнă – кĕмĕл медале тивĕçнĕ.
Роман Лоцманова вара ишсе тата чупса çитекенни ăмăртакансем хушшинче пулман. Пирĕн çамрăк спортсмен хăйĕн ÿсĕмĕнче (50 ачана яхăн!) çĕнтерÿçĕ ятне тивĕçнĕ. 1997–1998 çулсенче çуралнисем хушшинче пĕрремĕш теçеткене Муркашсем тÿрех виççĕн кĕме пултарнă. Евгений Григорьев кĕмĕле тивĕçнĕ, Виталий Иванов пĕтĕмĕшле 6-мĕш вăхăт кăтартнă, Анатолий Мастеров 10-мĕш пулнă.
Ачасене çитĕнÿсемпе саламлатпăр, малашне те ÿсĕмсем тума сунатпăр.
Н. НИКОЛАЕВА.