12 марта 2011 г.
Уяв спортпа туслисене пуçтарчĕ
Пĕтĕм тĕнчери хĕрарăмсен кунĕнче Муркаш районĕнчи спортпа туслă хĕрарăмсем пĕрле пухăнчĕç. Çакна валли сăлтавĕ те ырă пулчĕ. Муркаш тата Етĕрне районĕсен хисеплĕ гражданинĕ, Мăн Сĕнтĕрте çуралса ÿснĕ Крета Лазаревна Валицкая парнисемпе кубокне çĕнсе илессишĕн пĕрремĕш хут волейбол вăййисем иртрĕç.
Кăпасри 7 çул вĕренмелли шкултан пуçланнă пурнăç çулĕ ăна, харсăр та пуçаруллăскере, республика министрĕн должноçĕ таранах илсе çитернĕ. Тивĕçлĕ канура пулин те Крета Лазаревна паян обществăлла ĕçе хастар хутшăнать. Унра иксĕлми ăшă та ырă кăмăл пурри, пурнăçа юратни яланах сисĕнет. Ăмăртăва пуçтарăннă хĕрарăмсене саламласа район администрацийĕн пуçлăхĕ Ю. Иванов та, Чăваш Республикин Патшалăх Канашĕн депутачĕ В. Данилов та, районти волейбол федерацийĕн ертÿçи В. Вязов та Крета Лазаревнăн çак паха енĕсене асăнмасăр иртмерĕç. Çакăнпа пĕрлех вĕсем спортзала пухăннă кашни хĕрарăм ĕçре маттур пулни, çемье ăшшине тытса тăни хисепе тивĕççине палăртрĕç.
Хĕрарăмсен уявĕнче вара ăмăртăвĕ те парнеренех пуçланчĕ: кашни командăна тортсем парса савăнтарчĕç. Малаллахи парне ăмăрту хăй пулчĕ. Командăсем чылай пулнăран (пурĕ 14) вăйăсем виçĕ спортзалта иртрĕç: ФСК-ра, Муркашри вăтам шкулта тата Спорт çуртĕнче.
Интереслĕ те хĕрÿ вăйăсенче Мăн Сĕнтĕрти райпошăн вылянă команда паян районта чи вăйли пулнине тепĕр хут çирĕплетсе пачĕ. Муркаш салинчи хĕрарăмсен команди те куракансене ăмăрту тăршшĕпех илемлĕ вăйăпа савăнтарчĕ, иккĕмĕш вырăна тухма пултарчĕ. Виççĕмĕш вырăнта – «Мăн Сĕнтĕрти пурăнмалли çурт-йĕрпе коммуналлă хуçалăх» предприяти команди.
Н. НИКОЛЬСКАЯ.