12 марта 2011 г.
Кантăкран шаккать çуркунне
Хĕл кунĕсене ăсатса янă май чăвашсем мĕн авалтанпах чи хаваслă та çутă уявсенчен пĕрне – Çăварние уявланă. Çăварни эрнинче пĕтĕм халăх – ача-пăчаран тытăнса ваттисем таранах – юрланă-ташланă, вылянă-кулнă, хаваслă ăмăртусемпе вăйăсенче вăй виçнĕ. Кунпа пĕрлех уяв кучченеçĕпе – Çăварни икерчипе пĕр-пĕрне сăйланă. Çав кун Муркаш ялĕ ташă-юрă, вăйă-кулă, ачасен хаваслă сассипе тулчĕ. Художество пултарулăх коллективĕсен çутă та интереслĕ программи пурин кăмăлне те кайрĕ. Илемлетнĕ суту-илÿ палаткисенче вара пахча çимĕçне те, улми-çырлине те, кукăль-пĕремĕкне те, шашлыкне те туянма, вĕри чей ĕçме те май пулчĕ.
Кунсăр пуçне Муркашсемшĕн уяв эрнине мартăн 6-мĕшĕнче хĕл ăсатăвне ирттерни те хаваслăх парнелерĕ. Муркашри «Сывлăх» физкультурăпа спорт комплексĕ умĕнче уява официаллă майпа уçнă май пухăннисене район администрацийĕн пуçлăхĕ Ю.А. Иванов, ЧР Патшалăх Канашĕн депутачĕ, районти тĕп больницăн тĕп врачĕ В.Г. Данилов, Муркаш ял тăрăхĕн пуçлăхĕ Н.И. Никитин, «Свобода» тата «Ударник» хуçалăхсен ертÿçисем В.К. Ананьевпа П.П. Давыдов саламларĕç. Хĕл ăсатăвне пирĕн ентеш, тĕнче шайĕнче палăрнă спортсменка Вера Соколова та хутшăнма кăмăл тунă, вăл та уявра пурне те хавас кăмăл-туйăм сунчĕ.
Çав кун Муркаш ялĕ ташă-юрă, вăйă-кулă, ачасен хаваслă сассипе тулчĕ темелле. Художество пултарулăх коллективĕсем пухăннисене хăйсен ташши-юррипе савăнтарчĕç, хавас кăмăл-туйăм парнелерĕç. Уяв программине хатĕрлекенсем хĕл ăсатăвне асра юлмалла тăвассишĕн тимлени куç кĕрет.
Епле хĕл ăсатăвĕ-ха тата вăл кÿлнĕ çунасемсĕр, çил хăваласа катаччи чупмасăр; Янаварсемпе çунисене вара уява килекенсем уйрăмах хитре илемлетнĕ. Кÿлнĕ çунасен конкурсне ирттересси тахçанах йăлана кĕнĕ вĕт-ха. Конкурса 11 çуна хутшăнчĕ. Кайрантарах виçĕ лаша кÿлнĕ çуна та килсе çитрĕ.
Çурлатринчи çамрăк мăшăрсемшĕн – Наталья тата Петр Аксендаровсемшĕн (сăн ÿкерчĕкре) – çак кун уйрăмах асра юлĕ. Хăйсем пĕрлешнине çирĕплетме ЗАГС пайĕн çурчĕ умне вĕсем илемлетнĕ çунапа килсе чарăнчĕç.
Кÿлнĕ çунасен конкурсĕнче пĕрремĕш вырăна тивĕçлипех «Свобода» хуçалăх тухма пултарчĕ. Иккĕмĕш вырăна Шетмĕпуç ял тăрăхĕ, виççĕмĕшне Оринин ял тăрăхĕ йышăнчĕç.
Спорта юратакансемшĕн те кичем пулмарĕ уявра. Ачасем хоккей площадкинче, аслăраххисем хĕллехи мини-футбол енĕпе вăй виçрĕç. Массăллă тĕрлĕ вăйăсем те интереслĕ те хаваслă иртрĕç. Пĕр сăмахпа никама та кичем пулмарĕ уяв кунĕнче.
Çав кунах хĕл ăсатăвĕн уявĕ Мăн Сĕнтĕрте те кĕрлерĕ кăна. Çăварни уявне, хĕл ăсатăвне пасар айлăмĕнче ирттерме хăнăхнă. Кăçал та кунта театрализациленĕ фольклор представленийĕ те, пултарулăх коллективĕсен номерĕсем те, Çăварни вăййисем те, хаваслă ăмăртусемпе конкурссем те, кÿлнĕ çунасемпе ярăнасси те, Çăварни катемпине çунтарса яни те, тĕрлĕрен тутлă çимĕçĕ те пайтах пулчĕ. Хыççăн вара савăнăçлă лару-тăрура «Агронефтепродукт» СПСК» автозаправка станцине уçрĕç.
В. ШАПОШНИКОВ.