05 марта 2011 г.
Тивĕшсем маттур пулчĕç
Шетмĕпуç ял тăрăхĕнче спорта кăмăллани кунта пурăнакансем час-часах тĕрлĕ ăмăртусене хаваспах хутшăннинчен лайăх курăнать. Акă нарăс уйăхĕн 27-мĕшĕнче те пирĕн патра пысăк ăмăрту иртрĕ. Ял тăрăхĕн пуçлăхĕн куçса çÿрекен кубокне çĕнсе илессишĕн черетлĕ спартакиада çынсене чылай пуçтарчĕ. Ял тăрăхĕн пуçлăхĕ Н.П. Александров спорт уявĕн программипе паллаштарчĕ. Хыççăн вара пилĕк ялтан килсе çитнĕ командăсем эстафетăра, пăшалтан тĕл перессинче, шахмат, мини-футбол вăййисенче тата канат туртса вăй виçрĕç.
Ăмăртура Катăкуй ялĕн команди пек маттурри пулмарĕ. Шетмĕпуçсемпе Тивĕшсем хыççăнхи призлă вырăнсене тухрĕç. Спартакиадăна хутшăннă пур команда та парнесене тивĕçни пурин кăмăлне те хăпартрĕ.
Спорт уявне пухăннă ял çыннисене, спортсменсене Муркаш райповĕн Шетмĕпуçĕнчи куллен кирлĕ таварсен магазинĕ (заведующийĕ Е. Васильева) тата «Закусочная» кафе (заведующийĕ И. Петрова) вĕри чейпе, кукăль-пÿремечпе сăйларĕç.
О. ИЛЬИН,
Тивĕшри Культура çурчĕн
ертÿçи.