05 марта 2011 г.
Чи маттуррисем ăмăртрĕç
Нарăс уйăхĕн 22-мĕшĕнче Атапайри вĕрентÿпе культура центрне халăх лăк тулли пуçтарăнчĕ. Кунта çав кун Ю. Ковалева асăнса тата М. Музыков парнисене çĕнсе илессишĕн кире пуканĕ çĕклессипе республика шайĕнчи ăмăрту иртрĕ. Кăçалхипе – виççĕмĕш хут. Ăмăртакансем Муркаш тăрăхĕнчен кăна пулмарĕç, Етĕрне, Шупашкар районĕсенчен те килсе çитрĕç.
Ăмăртăва хаклаканĕ Иван Владимирович Смоленцев пулчĕ. Вăл – республикăри армспорт федерацийĕн президенчĕ. Тĕрлĕ категори виçинче ăмăртрĕç хĕрсемпе каччăсем. Етĕрнесем хастар пулчĕç, Муркашсем те кая юлмарĕç. Мăн Сĕнтĕр шкулĕнчи 10 класра вĕренекен Максим Морозова амăшĕ хавхалантарма килни те усăллă пулчĕ: каччă пĕрремĕш вырăна тухма пултарчĕ. Александр Морозов тата Орининти вăтам шкулта вĕренекен Дмитрий Пушков 2-мĕш вырăнсем çĕнсе илчĕç. Андрей Быковпа Константин Смелов, Юнкă шкулĕнче вĕренекен Артем Ягуновпа Евгений Чернов 3-мĕш вырăнсене тивĕçрĕç.
Хĕрсем хушшинче Марта Иванова (Юнкă шкулĕ) тата Кристина Петрова (Етĕрне районĕ) çĕнтерÿçĕсем пулса тăчĕç. Атапай шкулĕнче вĕрентекен С.Г. Вязова 2-мĕш вырăн çĕнсе илме хал çитерчĕ.
Мала тухнисем медаль-грамотăсемпе пĕрлех парнесене те тивĕçрĕç. Спонсорсем – «Поддержка» страхлакан компани менеджерĕ Г.Н. Киселева, М.Н. Музыков, А.И. Ковалев (Юрий Ильичăн пиччĕшĕ) тата ыттисем – ăмăрту ирттерме пулăшрĕç. Сăмахран, Г.Н. Киселева çĕнтерÿçĕсене пĕр çулталăклăх страхланине пĕлтерчĕ.
А. ИВАНОВА.
Атапай шкулĕ.