02 марта 2011 г.
Йĕлтĕрçĕсен сезон вĕçленмен
Чăваш Республикин чемпионне Ю. Федотова асăнса йĕркеленĕ республикăри йĕлтĕрçĕсен эстафети кăçалхипе 9-мĕш хут иртрĕ. Йăлана кĕнĕ тăрăх вăл Калайкасси шкулĕнче пулчĕ. Асăннă ăмăртăва шкулта вĕренекенсен, учитель коллективĕсен командисем, предприятисемпе организацисен ертÿçисем хутшăнчĕç.
Кăçал та старта йышлăн тухрĕç: республикăри районсемпе хуласенчен çитнĕ йĕлтĕрçĕсем çĕнтерес кăмăлпах килнĕ Калайкассине. Ăмăрту питĕ хаваслă та хĕрÿ пулчĕ. Пурин те хаклă парнесене, дипломсене тивĕçес килчĕ ĕнтĕ. Анчах кашни ăмăртурах чи вăйлисем çĕнтереççĕ. Вĕсем кăçал та кил хуçисем пулчĕç: вăтам ушкăнра та, аслă ушкăнри вĕренекенсем хушшинче те Калайкассинчи шкул ачисен командисем пĕрремĕш вырăна тухма пултарчĕç. Тĕп шкулсен командисем хушшинче чи хастаррисем Кашмашсем пулчĕç.
Ертÿçĕсен ăмăртăвĕ те хаваслă иртрĕ. Хĕрарăмсем хушшинче 1-мĕш вырăна хулари стоматологи поликлиникине ертсе пыракан Елена Федотова тухрĕ. Арçынсем хушшинче финиша Сергей Тасаков пĕрремĕш çитрĕ (Чăваш патшалăх университечĕ).
Чи кĕтнĕ те пăлхануллă самант – парнесем парса чыслани – сезон вĕçлениччен татах та çĕнĕ çитĕнÿсем тума хистет.
Хамăр инф.