02 марта 2011 г.
Сывлăхлă пулас тесен пирĕн спортпа туслă пулмалла. Ярапайкасси ял тăрăхĕнче пурăнакансем те çакна лайăх ăнланаççĕ. Кашни çулах тĕрлĕ ăмăртусем, спартакиадăсем ирттереççĕ. Нумаях пулмасть ял тăрăхĕн тата Ярапайкассинчи вăтам шкул администрацийĕсем йĕркеленипе кунта волейболла вылякансен спартакиади иртрĕ. Ăна Çĕр-шыв хÿтĕлевçин кунне халалларĕç.
Пĕтĕмпе ултă команда пухăнчĕ шкулти спортзала: Итакачкассинчен икĕ команда (çамрăксем тата аслăраххисем), Ярапайкассисем, Çамрăксен урамĕнчисем, Милютакасси команди, Ермак тата Шурча ялĕнчисем. Командăсем волейболла вылярĕç кăна мар, шашкăпа шахмат вăййисенче те, вĕрен туртассинче те вăй виçрĕç. Ытти тĕрлĕ вăйăсем те иртрĕç. Мала тухнисене чысласа ял тăрăхĕн пуçлăхĕпе В. Голубевпа шкул директорĕ Н. Кудряшов арçынсен уявне интереслĕ ирттерме пулăшнăшăн пухăннисене ырласа мухтарĕç, саламларĕç. Уяв чăннипех те хаваслă иртрĕ.