02 апреля 2011 г.
Иртнĕ шăмат кун Чăваш Республикин ял хуçалăхĕн тава тивĕçлĕ ĕçченне, «Герой» хуçалăха ертсе пынă А.Н. Иванова асăнса Шурчари тĕп шкулта спорт ăмăртăвĕ иртрĕ. Алексей Николаевичпа ĕçлеме тÿр килнисем, ăна лайăх пĕлекенсем район аталанăвĕнче унăн тÿпи пысăк пулнине палăртрĕç. Çакна А. Иванов çинчен шкулти музейра пухнă материалсем те çирĕплетсе параççĕ.
Ăмăрту спортăн тăватă тĕсĕпе иртрĕ: волейбол вăййисем, кире пуканне çĕклесси, армспорт тата канат туртасси. Ярапайкасси ял тăрăхĕнчи ултă команда вăй виçрĕ.
Волейболла выляса Кÿстерексем мала тухрĕç. Ăмăртура кире пуканĕ 71 хут çĕкленĕ Петр Халапсина çитекенни тупăнмарĕ. Сăмах май Петр пĕлтĕр Патăрьел районĕнче, кăçалхи февральте Çĕмĕрле районĕнче иртнĕ ăмăртусен призерĕ. Хĕрарăмсем хушшинче спортăн ку тĕсĕнче Екатерина Иванова çĕнтерÿçĕ пулчĕ. Ветерансен ретĕнче ăмăртнă И. Смоленцев, Н. Алексеев, О. Бардасова тата С. Павлова та малтисен ретĕнче пулчĕç. Армспорт ăмăртăвне курма та питĕ интереслĕ пулчĕ. Алă кĕрешĕвĕсем В. Сорокинăпа Н. Тимофеевăн алă вăйĕ ытларах пулнине кăтартса пачĕç. Канат туртассипе Шурчасем маттур пулчĕç. Пĕтĕмĕшле кăтартусем тăрăх куçса çÿрекен кубока Кÿстерексем тивĕçрĕç.
Ăмăртăва хутшăннă пур командăна та дипломсемпе укçан парнесем парса чысларĕç. Йĕркелÿçĕсемпе спонсорсене – «Герой» хуçалăх председательне Р. Тимофеева, районти ветстанци ертÿçине Н. Яковлева, В. Бардасов уйрăм предпринимателе, республикăри армспорт федерацийĕн ертÿçине И. Смоленцева, Шурча шкулĕн коллективне тата Алексей Николаевичăн ывăлне Ю. Иванова (Шупашкарти «Империя К» чикĕллĕ яваплăхлă общество директорĕн çумне) – ял тăрăхĕнче çакăн пек чаплă спорт уявĕ ирттернĕшĕн пысăк тав сăмахĕ калатпăр.
Т. ЕРМОЛАЕВА.