06 апреля 2011 г.
Çарта службăра пуласси кашни яшăн таса тивĕçĕ шутланать. ЧР Çар комиссариачĕн Муркашпа Элĕк районĕсенчи пайĕ çул çитнĕ çамрăксене çар ретне ăсатнипе пĕрлех контрактпа службăна каяс текен кандидатсене хатĕрлессипе те ĕçлет.
Кандидатсене чи малтанах Тĕп çар округĕнчи тата Таджикистан Республикин территорийĕнчи 201-мĕш çар базин чаçĕсене ăсатаççĕ.
Казарма общежитийĕсенче пурăнмалла пулать. Çемьеллисене служба хваттерĕсемпе тивĕçтереççĕ. Тĕп çар округĕнче уйăхсерен 10 пин тенкĕ ытла, 201-мĕш çар базинче 18 пин тенкĕ таран тÿлеççĕ. Кунсăр пуçне тата кварталта преми парассине, пĕр хут укçан тÿлессине, пурлăх тĕлĕшĕнчен пулăшассине т. ыт. те пăхса хунă.
Контрактпа службăна каяс текен кандидатсем «С», «Д», «Е» категорисемлĕ водительсем пулмалла, ĕç стажĕ 1 çулталăкран кая мар кирлĕ, сывлăхĕсем тивĕçтермелле.
Водитель удостоверенийĕ çуккисем ытти çар специальноçĕсемпе 201-мĕш çар базинче Таджикистанри Душанбе хулинче служба тивĕçне пурнăçлама пултараççĕ.
Пĕр уйăх службăра пулни 1,5 уйăх шутне кĕрет. Çакă пулас пенси виçипе тÿрремĕнех çыхăннă.
Ытти вăй министерствисен (ВВ МВД РФ, МЧС, ПС ФСБ) чаçĕсем валли те кандидатсем суйласа илеççĕ. Требованисем: 35 çултан аслă пулмалла мар, «С», «Д», «Е» категориллĕ водитель удостоверенийĕ кирлĕ, сывлăх шайĕ тивĕçтермелле, судпа айăпланнисене илмеççĕ.
РФ Оборона министерствин вĕренÿ çар заведенийĕсенче сержантсемпе старшинасен должноçĕсем валли те специалистсем хатĕрлеççĕ. Çавна валли кандидатсем пухасси 2011 çулхи апрелĕн 30-мĕшĕччен пырать. 2 çул та 10 уйăх вĕренмелле, тÿлевсĕр 3 хут çитереççĕ, пурăнмалли вырăнпа тивĕçтереççĕ, тумлантараççĕ, уйăхне 8–15 пин тенкĕ стипенди тÿлеççĕ.
Кандидатсен 24 çултан аслă пулмалла мар, 11 класран кая мар вĕренни кирлĕ, ЕГЭ тытнине пăхаççĕ, сывлăх шайне тĕрĕслеççĕ. Вĕренсе тухсан вăтам професси пĕлĕвĕ илни çинчен диплом параççĕ.
Хальхи вăхăтра контракт çырма 5 çынна ăсатнă, 2 кандидата вĕренме яма суйласа илнĕ. Хăвăра интереслентерекен ыйтусемпе Çар комиссариачĕн пайне пырас пулать, (8-835-41) 62-1-89, 62-7-01 телефонсемпе çыхăнмалла.
В. АНДРЕЕВ,
ЧР Çар комиссариачĕн Муркашпа Элĕк районĕсенчи пай пуçлăхĕ.