05 февраля 2011 г.
Иртнĕ юн кун пирĕн района Раççей Федерацийĕн Федераллă Пухăвĕн Патшалăх Думин депутачĕ Н.М. Бударин килсе кайрĕ. Чи малтан район администрацийĕн пуçлăхĕпе Ю.А. Ивановпа тĕл пулчĕ. Унтан шкул директорĕсемпе тата вĕсен çумĕсемпе канашларĕ.
Район администрацийĕн пуçлăхĕ Ю.А. Иванов тĕл пулăва уçнă май вĕрентÿ сферинчи лару-тăру çинче чарăнса тăчĕ. Учитель çулталăкĕнче сахал мар ĕç тунине палăртрĕ. Çавăнпа пĕрлех тумалли татах нумай. ЕГЭ результачĕсем тата та лайăхрах пултăр, вĕрентÿ поцесĕнчи ытти ыйтусемпе ĕçленипе пĕрлех шкулсен пурлăхпа техника никĕсне çирĕплетессипе те тумалли сахал маррине палăртрĕ. Районти 29 шкултан 8-шĕнче çивиттисене улăштарнă. Çивиттине те, чÿречесене те (ку ĕçе Йÿçкассисем кăна тунă-ха) пур шкулсенче те улăштармалла.
Çавăн пекех шкул çулне çитмен ачасем валли ача сачĕсенче вырăн тупса парассипе те вăхăта сая ямасăр ĕçлемелле. Хальлĕхе ку тĕлĕшри çăмăлах мар лару-тăруран çакăн пек меслетпе тухма шутлаççĕ: ача сачĕсем, пуçламăш шкул-садсем çумĕнче, культура çурчĕсем çумĕнче ачасене çÿретмелли вăхăтлăх ушкăнсем уçмалла. Иртнĕ çул Яраккассинчи Культура çурчĕ çумĕнче çакнашкал ушкăн уçăлчĕ.
Тĕл пулура шкул директорĕсем шкулсенче медицина пÿлĕмĕсене уçас ыйтăва хускатрĕç. Кашни шкула çав пÿлĕме туса кирлĕ оборудовани илсе лартма вăтамран 167 пин тенкĕ кирлĕ пулать. Районĕпе 5 млн. тенкĕрен кая пулмасть. Пĕчĕк сумма мар.
– Медицина учрежденийĕсем шкулсемпе юнашарах лараççĕ. Вĕсемпе килĕшÿ туса шкулта ачасен сывлăхне тĕрĕслесе тăрассине саккунпа çирĕплетсе хăварма çук-ши; – ыйтаççĕ вĕсем.
Николай Михайлович кашни ыйту çине уйрăммăн пăхмаллине, саккунпа килĕшÿллĕн пулăшма тăрăшнине палăртрĕ.
– Вăл е ку саккуна йышăннă чухне эпир вырăнти пуçаруллă сĕнÿсене шута илетпĕр. Пирĕн сирĕнпе пĕрле ĕçлемелле. Эсир пуçаруллă пулсан эпир яланах пулăшма хатĕр, – терĕ вăл.
Депутат çакăн пек тĕслĕх илсе кăтартрĕ. Улатăрта педагогсем курссене вĕренме кайнă вăхăта пĕрлехи стажа кĕртменни пирки пăшăрханни çинчен пĕлтернĕччĕ. Ку ыйту халĕ вырăнтан тапраннă иккен. Çитес вăхăтрах депутатсен сĕнĕвне Правительствăра пăхса тухмалла-мĕн.
Ачасен сывлăхне пырса тивекен ыйтăва малалла тăснă май район пуçлăхĕ районти шкулсен Муркашри «Сывлăх» ФСКна час-час çÿремеллине, вуншар çул каяллахи пек ачасене ГТО нормисемпе зачет партарас ыйтăва хускатрĕ.
– Кашни ача хăйĕн сывлăхĕ мĕнле шайра пулнине çирĕплетме пултарать, ку енĕпе аталанма тăрăшать. Çапла майпа çеç эпир ачасене компьютертан уйăрма пултаратпăр, – терĕ вăл.
Депутат Юрий Александровичăн шухăшне ырларĕ. Çак пуçарăва вырăнта хамăртан пуçламаллине палăртрĕ.
– Эпĕ пĕрремĕш укçана 8 класс хыççăн ĕçлесе илтĕм. Ещĕксем юсаса кунне 2 тенкĕ те 50 пус ĕçлесе илеттĕм. Хăйсем ĕçлесе илсен çеç ачасем çын ĕçне, япала хакне пĕлме пуçлаççĕ, –терĕ Николай Михайлович.
Пуçтарăннисем çавăн пекех çамрăк учительсем валли çурт лартма çĕр уйăрас тата ытти ыйтусене те хускатрĕç.
Н.М. Бударин çак кун район центрĕнчи «Сывлăх» ФСК, Муркаш райповĕн суту-илÿ предприятийĕсенче пулчĕ, халăха харпăр хăй ыйтăвĕсемпе йышăнчĕ.
Л. ПАВЛОВА.