02 февраля 2011 г.
Учитель çулталăкне вĕçлесе иртнĕ эрне кун Муркашри вăтам шкулта савăнăçлă уяв иртрĕ. Çулталăк пĕтĕмлетĕвĕ. Мĕнлерех пулчĕ-ха вăл пирĕн районти педагогсемшĕн; Малашнехи утăмсем тата мĕнпе çыхăннă; Çак тата ытти чылай ыйту хускатрĕç вĕрентÿ ĕçченĕсем.
Уяв район администрацийĕн пуçлăхĕ Ю.А. Иванов Раççейри вĕренекенсен олимпиадин муниципаллă тапхăрăн çĕнтерÿçисемпе призерĕсене хатĕрленĕ учительсене чысланинчен пуçланчĕ. Йÿçкассинчи вăтам шкулта истори, обществознани тата право предмечĕсене вĕрентекен В.И. Тихоновăн 16 вĕренекенĕ, Орининти вăтам шкулти физкультура учителĕн С.И. Алексеевăн 10 вĕренекенĕ, çак шкултах историпе обществознани урокĕсене ертсе пыракан В.И. Алексеевăн 8 вĕренекенĕ, Муркашри вăтам шкулти информатика учителĕн О.К. Волковăн 6 вĕренекенĕ, ку шкулти биологи учителĕн В.Н. Ивановăн 6 вĕренекенĕ, Çатракассинчи вăтам шкулти технологи учителĕн М.М. Димитриевăн 6 вĕренекенĕ тата Муркаш лицейĕнчи хими предметне вĕрентекен Н.В. Казаковăн 6 вĕренекенĕ район шайĕнче палăрнă.
Шетмĕпуçĕнчи тĕп шкулта чăваш чĕлхипе литературине вĕрентекен И.В. Раевская та ĕçри ăнăçусемшĕн район администрацийĕн пуçлăхĕнчен Тав çырăвĕ илме тивĕçрĕ.
Шкул коллективĕсем Учитель çулталăкĕ мĕнле иртнине массăллă информаци хатĕрĕсенче çутатса тăрассипе те тимлерĕç иртнĕ çул. Конкурс çĕнтерÿçи Чуманкассинчи шкул коллективĕ пулчĕ. Призлă вырăнсене Йÿçкассинчи тата Юнкăри вăтам шкулсем тивĕçрĕç.
Районти педагогсем хăйсен ăсталăхне ÿстерессипе нумай тимлеççĕ. Çавăнпах уявра Чăваш Республикин тава тивĕçлĕ учителĕсем, Чăваш Республикин вĕрентĕвĕн тава тивĕçлĕ ĕçченĕсем пирки те асăнмасăр хăвармарĕç. Çамрăксен вĕсенчен тĕслĕх илмелле-çке-ха.
Çамрăксем тенĕрен. Иртнĕ çул Л.В. Ванюшкина, П.В. Борзаев тата С.Н. Цветкова çамрăк педагогсем ЧР Президенчĕн стипендине илсе тăракансем пулчĕç.
2010 çулта Чăваш Республикин Президенчĕн грантне çĕнсе илнисем те пур педагогсен ретĕнче: С.И. Алексеев (Оринин шкулĕ), А.Ю. Герасимова (Турай), Л.А. Ядыкова (Ярапайкасси), Н.А. Порфирьева («Путене» ача сачĕ). Çакă, паллах, учительсен ĕçлес туртăмĕ пысăк пулнине палăртать.
Иртнĕ çул конкурссемпе уйрăмах пуян пулчĕ. Районти «Çулталăкри учитель» професси ăсталăхĕн конкурсĕнчен пуçласа Раççей шайĕ таранах. Акă Нискассинчи вăтам шкул учителĕ М.В. Да-нилова «Профессире вырăс чĕлхипе ăста усă курнăшăн» конкурсра Раççей çĕнтерÿçи пулса тăнă. Ильинкăри вăтам шкулта ĕçлекен С.К. Яртеева ва-ра Учитель çулталăкне халалланă такмаксен пĕтĕм Раççейри конкурсĕнче çĕнтернĕ. Республикăри тĕрлĕ конкурссен çĕнтерÿçисемпе призерĕсене, ытти паллă мероприятисене хутшăннисене – хастар педагогсене пурне те саламларĕç уявра.
Юлашки çулсенче шкулсене общество енчен тимлĕх уйăрассипе сахал мар ĕç пулса иртет. Район администрацийĕн вĕрентÿ, çамрăксен политики тата физкультурăпа спорт пайĕн ертсе пыракан канашĕн председателĕ Н.Г. Ванеркин та кун пирки тепĕр хут аса илтерчĕ. Учитель çулталăкĕнче ирттернĕ «Хальхи шкул ашшĕ-амăшĕн куçĕпе» конкурсăн районти çĕнтерÿçипе призерĕсене Николай Григорьевич саламласа чысларĕ. Районти çĕнтерÿçĕ – Шомикри тĕп шкулăн ертсе пыракан канашĕ – республикăри призерсен шутне кĕме пултарчĕ. Унсăр пуçне Орининти, Мăн Сĕнтĕрти ертсе пыракан канашсем лайăх ĕçленине те палăртмалла. Çатракасси, Ильинка тата Ярапайкасси шкулĕсенче те ку ĕçе малтанхинчен çÿллĕрех шая çĕклеме пултарни аван.
Хисеплĕ ветеран педагогсене те саламларĕç, учительсен Тăван çĕр-шывăн Аслă вăрçипе çыхăннă истори страницисене те «уçса вуларĕç» уявра. Анчах та Учитель çулталăкĕ вĕçленнипе ĕç чакмасть-ха педагогсен. Çулталăка пĕтĕмлетсе малашнехи ĕçсемпе вĕрентÿ пайĕн ĕçĕсене туса пыракан И.А. Ершова паллаштарчĕ. Умра çĕнĕрен те çĕнĕ тĕллевсем. Пысăк пĕлтерĕшлисенчен пĕри – çĕнĕ стандартпа вĕрентесси çине куçасси. Учительсене аттестацилес ĕçре те çĕнĕлĕхсем кĕтеççĕ.
Н. НИКОЛАЕВА.