29 января 2011 г.
Чăваш Республикинчи Роспотребнадзор управленийĕн территори уйрăмĕн эпидемиолог врачăн пулăшаканĕ Т.Г. Григорьева пĕлтернĕ тăрăх районта хальлĕхе грипп чирне регистрацилени пулман-ха. Анчах та респираторлă вируслă инфекци чирĕпе чирлекенсен хисепĕ ÿссе пыни курăнать. Январь уйăхĕн малтанхи çирĕм кунĕнче кунсерен районта 4-11 çын чирленине регистрациленĕ. Паян вара лару-тăру япăхрах. Акă январĕн 24-мĕшĕнчен тытăнса кунсерен 30 çын ытла чирлет.
Чирлекенсенчен ытларахăшĕ ачасем. Муркаш тата Москакасси (кунти шкулта та, садикре те чирлекенсем йышлă) участокĕсенче ку енĕпе лару-тăру ыттисенчен çивĕчрех тăрать.
Респираторлă вируслă инфекци чирĕпе чирлессинчен, ытти чирсем пекех, асăрханмалла. Асăрханни чире сиплессинчен çăмăлрах. Апла ăшăрах тăхăнни кăна мар, организм иммунитечĕ вăйлă пулни те чирлессинчен хăтарма пултарать. Çавăнпа та «аскорбинка» тата ытти поливитаминсене йышăнни пулăшать. С витамин вара йÿçĕтнĕ купăста сĕткенĕнче, лимонра, кивире, мандаринра, апельсинпа грейпфрутра та нумай.
Шăнса пăсăлсан, гриппа чирлесен, ÿслĕк пулсан ăшăтнă 1 стакан сĕт ăшне 1 апат кашăкĕ пыл ярса ирĕлтерĕр. Кунне çак хутăша 2-3 стакан ĕçмелле.
3 апат кашăкĕ чухлĕ типĕтнĕ çăка чечекне 1 стакан вĕретнĕ шыва 8-10 минутлăх ямалла. Килĕштернĕ чухлĕ пыл хушмалла. Çак шĕвеке кунне 3 стакан ĕçмелле. Çакă шăнса пăсăлсан е гриппа чирленĕ чухне пулăшать тата профилактикăн усăллă мелĕсенчен пĕри.
Хăмла çырлинчен чей хатĕрлемелле (1:10). Кунне 3-4 стакан чухлĕ ĕçни шăнса пăсăлнă чух аван пулăшать. Хăмла çырли кĕлеткене тарлаттарса чире хăвалать.
Гриппа чирленĕ чух вара пылпа ыхра хутăшĕпе сипленни вырăнлă. Ыхра шăлĕсене тасатса терка витĕр кăлармалла, çавăн чухлех пылпа хутăштармалла. Кунне 2 чей кашăкĕ чухлĕ ĕçмелле. Ăна ăшă шывпа ĕçме сĕнеççĕ.
Н. НИКОЛАЕВА.