19 января 2011 г.
2011 çулхи январĕн 1-мĕшĕнчен тытăнса 2010 çулхи декабрĕн 8-мĕшĕнче йышăннă 345-ФЗ " Федераллă саккун вăя кĕчĕ. Унпа килĕшÿллĕн соцпакет тĕлĕшпе калакан пункта улшăнусем кĕртнĕ.
Çапла вара «медицина пайне» икĕ пая уйăрнă:
– эмел пайĕ – кунта врач рецепчĕпе эмелпе тÿлевсĕр тивĕçтерессине, ытти медицина хатĕрĕсемпе тивĕçтерессине, кунпа пĕрлех инвалид ачасене ятарлă сиплев продукчĕсемпе тивĕçтерессине кĕртнĕ;
– санаторипе курорт пайĕ – кунта медицина кăтартăвĕсемпе тĕп чир-чĕр профилактики енĕпе санаторисемпе курортсене кайма путевкăсемпе тивĕçтересси пирки каланă.
Апла пулсан 2011 çулхи январĕн 1-мĕшĕнчен тытăнса соцпакет виçĕ пайран тăрать: эмел пайĕ, санаторипе курорт пайĕ тата транспорт пайĕ.
Соцпакетăн пĕтĕмĕшле виçи 705 тенкĕпе танлашать. Вăл шутран эмел пайĕ 543 тенкĕ, санаторипе курорт пайĕ 84 тенкĕ тата транспорт пайĕ 78 тенкĕ. Федераллă çăмăллăхсемпе усă курма тивĕçлисем социаллă çăмăллăхсемпе пачах усă курмасан та е вĕсенчен хăшĕсемпе усă курмасан та пултараççĕ.
Федераллă çăмăллăхсемпе усă куракансем 2011 çулхи январĕн 1-мĕшĕнчен тытăнса 2008 çултан тытăнса 2010 çулхи октябрĕн 1-мĕшĕччен пĕтĕмĕшле соцпакетпа е медицина пайĕпе усă курассинчен хăтарма, çавăн пекех вĕсемпе усă курма тытăнма ыйтса заявлени çырнă пулсан, вĕсем малашне соцпакетăн эмел тата санаторипе курорт пайĕпе усă курма е усă курма пăрахма заявлени çĕнĕрен çырма пултараççĕ. Заявлени ăна çырнă вăхăтран тытăнса тепĕр уйăхăн 1-мĕш кунĕнчен вăя кĕрет.
Çавна палăртса хăвармалла. 2011 çулхи апрелĕн 1-мĕшĕччен хальхи йĕркене улăштарас шухăшлисен кăна заявлени çырмалла. Енчен те çăмăллăхсемпе усă куракан нимĕн те улăштарас темест пулсан Пенси фондне пыма кирлĕ мар.
Пирĕн районта федераллă çăмăллăхсемпе усă куракансем 3 пин çын ытла. Кусем вĕсем Аслă Отечественнăй вăрçă участникĕсем, инвалидсем, çапăçу хирĕсенче пулнă ветерансем, радиаци катастрофисене пула шар курнă граждансем. Вĕсенчен 22 проценчĕ соцпакетпа е унăн пайĕпе усă курать.
Е. АЛЕКСАНДРОВА,
РФ Пенси фончĕн районти управленийĕн пуçлăхĕ.