18 декабря 2010 г.
Пирĕн районта кире пуканĕ çĕклесси анлă сарăлман спорт тĕсĕ темелле. Çапах та ăна кăмăллакансем, çак спорт тĕсне ыттисене те явăçтарас текенсем çук мар.
Акă иртнĕ шăмат кун, декабрĕн 11-мĕшĕнче, Шупашкар районĕнчи Вăрман-Çĕктерти вăтам шкулта яшсемпе хĕрсем хушшинче республика ăмăртăвĕ пулчĕ. Ăна Афганистанра паттăрла пуç хунă Геннадий Калинин интернационалист салтака асăнса ирттерчĕç.
Ăмăртура районсемпе Шупашкар хулинчен килнĕ спортсменсем хушшинче Мăн Сĕнтĕр пăхаттирĕсем те палăрнă. Хăйсен виçе категорийĕнче Александр Морозов 1-мĕш вырăна, Максим Морозов 3-мĕш вырăна тухма пултарнă.
Маларах вара Шупашкарта «Хыпар» хаçат парнисене çĕнсе илессишĕн иртнĕ ăмăртура Шурчари тĕп шкулта вĕренекен Екатерина Иванова хăйĕн виçе категорийĕнче иккĕмĕш пулнă. Кубокпа кĕмĕл медале тивĕçнĕ. Çав ăмăртурах ветерансен ушкăнĕнче ăмăртнă Иван Смоленцев 3-мĕш вырăна тухса парнесене тивĕç пулнă.
Апла районта кире пуканне çĕклекенсем çине те шанăç пур. Ветерансем, аслисем тĕслĕх кăтартса çамрăксене çак спорт тĕсĕпе хавхалантарсан вăл тата анлăрах сарăлĕ.
Н. НИКОЛАЕВА.