22 декабря 2010 г.
Эрне кун, декабрĕн 24-мĕшĕнче, Сыпай ялĕнче хоккей курупкине уçаççĕ. Районти сумлă хăнасем кăна мар, Шупашкарпа Çĕнĕ Шупашкартан та килме палăртнă çак савăнăçлă мероприятие.
Пĕлтĕр кунта аслисем хавхалантарнипе, пулăшнипе ачасемпе çамрăксем пĕве çинчи пăра тасатса тăчĕç. Хоккейла сахал мар вылярĕç Сыпайсем. Район тата унăн тулашĕнчи ăмăртусене те хутшăнма пултарчĕç.
Кăçал вара ялта шкулпа юнашар хоккей курупкине тăвассипе çуллахи шăрăхра та, кĕрхи сивĕ те йĕпе çанталăкра та тăрăшрĕç. Кунта пурăнакан Александр Шишкин йĕркелесе пычĕ çак ĕçе. Унăн тÿпи пысăккине Сыпай шкул директорĕ В. Дашков уйрăммăн палăртать. Ачасемпе çамрăксене те çак ĕçе явăçтарма пултарнишĕн хĕпĕртенине пытармасть вăл. Вĕсемшĕн тăрăшаççĕ-çке кунта. Çакна кура пуçаруçăсене пулăшакансем татах пулнă. Ытларахăшĕ – предпринимательсем. Акă Владимир Любимовпа Георгий Яшков хăмасем парса пулăшнă, Алексей Ершов – тимĕр-тăмăр енчен, халĕ ав вылякансене хывăнса тумланмалли пÿлĕме ăшăтмалли кăмака та хатĕрлесе пĕтерет. Ольга Шишкина, Эдуард Баранов, Григорий Воронин тата ыттисем те пулăшнă. Шкулта вĕренекенсем вара çулла пĕр ĕç туса икĕ мулкачă тытнă тейĕн: çырмасенчи тимĕр-тăмăра пухса вĕсем курупка тума укçа-тенкĕ те ĕçлесе илнĕ, тавралăха та тирпей-илем кÿнĕ.
Ачасене хоккейла выляма формăпа тивĕçтерессине малтанлăха «Чуваштоппром» директорĕ Александр Федотов хăй çине илнĕ. Хапхана хÿтĕлекенĕн формипе хатĕр-хĕтĕрĕ (клюшкăсăр) хăй 20 пин тенкĕ ытла тăрать мĕн. Апла пулин те ентеш çамрăксен пуласлăхне мала хуни курăнать. Çĕнĕ Шупашкарти «Сокол» хоккей командин тренерĕ те пулăшу парсах тăрать. Ачасем унти пăр çинче пĕрре мар ярăннă, унти тренировкăсене пăхма та тÿлевсĕрех çÿренĕ.
Курупкана уçнă кун вара Сыпайсем хăнана Муркашри тата Юнкăри хоккеистсене те йыхравлаççĕ. Вăйăсем интереслĕ пулма шантараççĕ. Килсе курăр!
Н. НИКОЛАЕВА.