11 декабря 2010 г.
Районта спортăн тĕрлĕ тĕсĕсене аталантарассипе çулсеренех тĕрлĕ ăмăртусем иртеççĕ. Районти волейбол, хоккей тата ытти федерацисем йĕркеленни те пĕрремĕш çул мар. Федераци ертÿçисем хăйсене шанса панă спорт тĕсне районта ытларах сарас тесе район администрацийĕн вĕрентÿ, çамрăксен политики тата физкультурăпа спорт пайĕпе килĕшсе çитес çул валли ăмăртусен йĕркине те çирĕплетрĕç.
Çамрăксем те, аслăрах ăрурисем те чылайăшĕ волейбол вăййине кăмăллани паллă. Районта та волейбол япăх мар аталаннă темелле. Иртнĕ кунсенче акă Орининти вăтам шкулта С. Колбасов спорт маçтăрĕн (кикбоксинг) кубокне çĕнсе илессишĕн волейбол ăмăртăвĕ иртрĕ. Унта пурĕ сакăр команда пухăнчĕ. Вĕсем хушшинче шкул ачисен командисем те, ял тăрăхĕн те, тĕрлĕ хуçалăхсемпе пĕрлешÿсен командисем те пулчĕç.
– Спорт çакăн чухлĕ çынна пĕрле пуçтарăнса хăйсен вăхăтне усăллă ирттерме, ыттисене вăйăпа киленме май пани питĕ лайăх. Волейбол – илемлĕ вăйă, командăпа пĕрлĕхе туйса вылямалли вăйă. Çавăнпах ăна нумайăшĕ килĕштерет те. Апла ăна районта сарас тĕллевпе çитес çул валли çĕнĕ ăмăртусем плана кĕртсе тĕрĕс турăмăр тесе шутлатăп, – палăртать хăйĕн шухăшне районти волейбол федерацийĕн ертÿçи Валерий Иванович Вязов. Оринин шкулĕнче иртнĕ ăмăрту та паллах вăл хутшăнмасăр пулмарĕ.
Район шайĕнче волейбола тата та çÿллĕрех шая çĕклес, ытларах çынна явăçтарас текенсем пурри лайăх. Анчах та вырăнсенче те хастаррисем кирлĕ. Çамрăксем е ветеран ретне кĕнисем, хĕрарăмсем е арçынсем – пуçаруллă çынсем пурах. Хĕллехи каçсенче спортзалсене çÿрекенсем те. Пуçăннă ĕçе пĕтме памалла мар кăна.
Çитес çул акă волейболла вылякансем валли район шайĕнче çирĕме яхăн ăмăрту ирттерме пăхса хунă. Унчченхи çулсенче хĕрарăмсем «пире валли ятарлă ăмăрту çук» тенине шута илни тÿрех куçа курăнчĕ. Çитес çул, сăмахран, волейбола кăмăллакан пикесем февраль уйăхĕнче районта мала тухассишĕн иртекен ăмăртура кăна вăй виçмĕç. Вĕсем валли Пĕтĕм тĕнчери хĕрарăмсен кунĕнче те ăмăрту иртĕ. Вăл вара Муркаш районĕн хисеплĕ çыннин К. Валицкаян парнисене çĕнсе илессишĕн иртет. Апла хĕрарăмсен те паянах тренировкăсене тухассине йĕркелемелле. Волейбол шкул ачисене те, арçынсене те айккинче тăратса хăвармасть. Акă хĕллехи каникулта районти Çамрăксен парламенчĕн кубокне çĕнсе илессишĕн вăтам классенче (9 класчен) вĕренекенсем хушшинче те ăмăрту иртĕ. Йăлана кĕнĕ «Росгосстрах» кубокне, районти тĕп больницăн тĕп врачĕн кубокне çĕнсе илессипе те ăмăртусем пулĕç. Пĕтĕмĕшле çитес çулхи январь – апрель уйăхĕсенче кашни уйăхрах 3-4 ăмăрту ирттерме палăртнă. Апла ăмăртусене вĕсенче пурте активлă хутшăнар! Хамăрăн сывлăха массăллă спорт урлă çирĕплетер!
Н. НИКОЛАЕВА.