04 декабря 2010 г.
Иртнĕ шăмат кун Шупашкарта дуатлон (ишесси тата чупасси) енĕпе республикăра малтисене тупса палăртассипе ăмăрту иртрĕ. Унта пирĕн районти ушкăн та тивĕçлĕ хутшăнса аван кăтартусемпе таврăнчĕ.
Хăйĕн ÿсĕмĕнче Ирина Григорьевăна çитекенни республикăра пулман. Ăмăртура çĕнтерсе хастар хĕр ача киле дипломпа тата ылтăн медальпе таврăннă. Марина Плечова (4-мĕш), Ксения Никонова, Алена Степанова та япăх мар ăмăртнă. Арçын ачасем хушшинче Дмитрий Данилов кĕмĕл медале тивĕçме хал çитернĕ. Роман Лоцманов (5-мĕш), Евгений Григорьев (6-мĕш), Виталий Иванов тата Андрей Иванов та хăйсен кăтартăвĕсемпе ăмăртакансен малтанхи çуррине лекнĕ.
В.Д. Герасимов тренер ачасен лайăх кăтартăвĕнче унăн тата ишекенсен хăйсен тÿпи кăна мар, вĕсен ашшĕ-амăшĕсен тÿпи те пысăккине калать. Хăйсен ывăл-хĕрĕ аталанса пырас ĕçе вĕсем активлă хутшăнаççĕ мĕн. Ку, паллах, тĕрĕс.
Ишекен ачасем хушшинче пурте Муркашри вăтам шкулта вĕренеççĕ. Вĕсем вара ответлăха туякан тата ĕçлеме ÿркенмен ачасем пулнине палăртать тренер. Çавăнпах пулĕ шкулта та вĕсем çине çăмăл мар тата чылай ĕç тиенет. Ачасем вара тренировкăсенче те пĕтĕм вăй-хала парса ĕçлеççĕ. «Тен учительсен çак ачасене кăна мар, шкулта вĕренекенсен пысăк (!) коллективĕнчи ытти ачасене те тĕрлĕ мероприятисене ирттерме, хутшăнма шанса памалла; Хăвăрт та тĕрĕс ишесси пурин те пулмасть, анчах та шкулти конкурссене кашни вĕренекенĕнех хутшăнса курас килет-çке-ха», – акă мĕнле палăртать тренер хăйĕн воспитанникĕсен тепĕр чухне тренировкăсене сиктермелле пулса тухнине. Кашни кун тĕллевлĕ ĕçлемесен вара ачасене çитĕнÿсем тума та йывăртарах.
Иртнĕ ăмăртура вара вĕренекенсем хăйсен аслă юлташĕсем ишнине те сăнама пултарчĕç. Ветерансен йышнче ăмăртнă Игорь Смирнов преподаватель тренер тата районти шалти ĕçсен пайĕн сотрудникĕ Любовь Плечова иккĕшĕ те 2-мĕш вырăнсене тухма пултарнă. Апла ачасен малалла аталанма ырă тĕслĕх пур.
Н. НИКОЛАЕВА.